Angliýanyň öňki futbolçysy Dewid Bekhem geljek hepde rysar bolar diýip, The Times we BBC Sport habar berdi.
Bekhemiň ady iýun aýynyň ortalarynda çap ediljek resmi sylag sanawynda peýda bolar. Ol Beýik Britaniýanyň Patyşasy Çarlz III-niň, adatça monarhyň hakyky doglan senesine gabat gelmeýän, resmi doglan gününe gabatlanýar.
Bekhem derejäni almak bilen "ser" (jenap) bolar, aýaly, öňki Spice Girls toparynyň agzasy Wiktoriýa Bekhem bolsa "ledi" bolar.
The Guardian gazetiniň berýän habaryna görä, är-aýal Bekhemler patyşa maşgalasynyň agzalary bilen baglanyşykly çärelere birnäçe gezek gatnaşypdyrlar. Maý aýynda olar Çelsi gül sergisinde, fewral aýynda bolsa Beýik Britaniýa bilen Italiýanyň arasyndaky gatnaşyklary ösdürmäge bagyşlanan Haýgrouweda geçirilen resmi agşamlyk naharynda görüldi.
Bekhem futbolçy bolan döwründe “Mançester Ýunaýtedde”, “Realda”, “Milanda”, “PSŽ-da” we “Los-Anželes Gelakside” oýnady. “Mançester Ýunaýted” bilen alty gezek Angliýanyň premýer-ligasynda we bir gezek Çempionlar ligasynda (1999-njy ýylda) ýeňiji boldy. Angliýanyň milli ýygyndysy üçin 115 oýun oýnady we 17 pökgi geçirdi.
Häzirki wagtda Bekhem Lionel Messiniň oýnaýan “Inter Maýami” amerikan futbol klubunyň şärikdeş eýesi.
