Aktýor Tom Kruz ot alan paraşýut bilen 16 gezek böküp, Ginnesiň rekordlar kitabyna girmegi başardy. Howply hokga (trýuk) franşizanyň «Missiýa ýerine ýetirmesiz: Ahyrky hasaplaşyk» («Mission: Impossible – The Final Reckoning») atly sekizinji filminiň surata düşürilýän wagty ýerine ýetirildi.
Filmiň sýužetine görä, Kruzyň ýerine ýetirýän keşbi Itan Hant paraşýut bilen bökýär, emma ol birden ot alýar. Ol paraşýudy boşadýar we ýer bilen çaknyşmaga sekuntlar galanda ätiýaçlyk paraşýudyny açýar.
Hokgalaryň ählisini aktýoryň özi ýerine ýetirdi. Böküşler Günorta Afrikanyň Drakensberg daglarynyň üstünden, 7500 fut (takmynan, 2,2 km) beýiklikdäki dikuçardan amala aşyryldy. Paraşýutlar öňünden ýanyjy maddalara batyrylypdyr.
«Eger paraşýudyň ot alan mahaly daňlar çolaşsa, men aýlanyp başlaryn we ýanyp giderin. Muny düzetmek üçin bary-ýogy 10 sekunt wagtym bolar» — diýip, Kruz surata düşüriliş mahaly düşürilen wideoda aýdýar.
«Tom Kruz Golliwudyň iň täsirli aktýory bolmak bilen çäklenmän, kinoteatrlarda girdeji toplamak boýunça hem iň üstünlikli aktýordygyny köpden bäri subut etdi. Ol yzly-yzyna 100 million dollardan köp girdeji gazanan filmlere iň köp gatnaşan ýyldyzdyr» — diýip, Ginnesiň rekordlar kitabynyň baş redaktory Kreýg Glendeý belläp geçdi.
