Ýewropadaky birnäçe awtoulag zawody we önümçilik tapgyrlary seýrek ýerüsti elementleriniň ýetmezçiligi sebäpli, işini togtatmaga mejbur boldy. Munuň sebäbi bolsa, Hytaýyň bu çig mallaryň eksportyna girizen çäklendirmeleri boldy diýip, Ýewropanyň «CLEPA» awtokomponentler assosiasiýasyna salgylanyp, «Reuters» agentligi habar berýär.
CLEPA-nyň maglumatlaryna görä, aprel aýynyň başyndan bäri, awto üpjün edijiler ýüzlerçe eksport ygtyýarnamasy üçin ýüz tutdy, emma olaryň diňe dörtden biri tassyklandy. Käbir ýüzlenmeler «aşa prosedura sebäpleri» esasynda ret edildi.
«Talaplar welaýatlara görä üýtgeýär, käbir halatlarda intellektual eýeçilik bilen baglanyşykly maglumatlar hem soralýar» — diýip, CLEPA belläp geçdi. Şeýle hem assosiasiýa eger bu proseduralar ýönekeýleşdirilmese, öňümizdäki 3-4 hepdäniň dowamynda ätiýaçlyk serişdeleri gutaranda, has köp zawodyň kynçylyklar bilen ýüzbe-ýüz boljakdygyny duýdurdy.
Hytaý aprel aýynda seýrek ýer elementleriniň köpüsiniň eksportyny wagtlaýyn togtatdy. Bu ýagdaý dünýä boýunça awtoulag we aerokosmos pudaklary, ýarymgeçiriji önümçiligi, şeýle-de harby potratçylar üçin örän möhüm bolan üpjünçilik zynjyrlaryna zyýan ýetirdi.
Germaniýanyň, ABŞ-nyň we Hindistanyň senagat birleşikleri syýasatçylary bu mesele boýunça çäre görmäge we Hytaý bilen tiz wagtda çözgüt tapmak üçin gatnaşyklary ýola goýmaga çagyrdylar.
