Robotera hytaý kompaniýasy «STAR1» atly gumanoid roboty hödürledi. Ol däp bolan naharlary bişirmegi hem-de taýajyklar bilen naharlanmagy başarýar. Kompaniýanyň «YouTube» kanalynda bu görkezmäniň wideosy ýerleşdirildi.
Robot 12 derejeli erkinligi bolan täze «XHAND1» bäş barmakly el bilen enjamlaşdyryldy. Başam we süýem barmaklarynda üç derejeli, galan barmaklaryň hersinde bolsa iki derejeli erkinlik bar. Munuň netijesinde, hereketler adam eliniň hereketlerine örän meňzeýär.
Robotyň elleri ýokary takyklykly taktil datçikler bilen üpjün edilen. Olar obýektleriň gurluşyny we temperaturasyny duýup bilýär. Hytaýyň däp bolan aşhana wezipelerini ýerine ýetirmek boýunça tälim berlen «STAR1» börek ýasaýar, bugda mantou bişirýär, çakyr guýýar, hatda bulgurlary çakyşdyrýar.
«STAR1» ozal diňe fiziki ukyplaryny görkezipdi. Geçen ýyl bu robot krossowka geýip, çylşyrymly ýolda bäsleşige gatnaşypdy. Ol aýakýalaňaç bäsdeşinden geçip, tizligini 12,8 km/sag çenli ýetirdi we bu tizligi 34 minutlap saklady.
Gumanoid robotyň beýikligi 1,7 metr. Ol 55 derejeli erkinlige eýe bolup, bogunlary 400 N·m çenli torky üpjün edýär. Kompaniýa «STAR1-iň» daşky gurşawy seljermäge we oňa uýgunlaşmaga ukybynyň bardygyny aýdýar. Onuň ulgamy minutda 275 amaly ýerine ýetirip bilýär.
