1-nji iýunda Prezident Serdar Berdimuhamedow döwlet sapary bilen Mongoliýa ugrady.
Mongoliýanyň paýtagty Ulan-Batoryň “Buýant-Uhaa” Halkara howa menzilinde Türkmenistanyň Prezidentini resmi adamlar garşyladylar.
Asylly däbe görä, belent mertebeli myhmana mongol milli tagamy — gurt hödür edildi we gül desseleri gowşuryldy.
Döwlet Baştutany howa menzilinden sapar mahaly özi üçin bellenilen kabulhana tarap ugrady.
Şu gün, 2-nji iýunda — saparyň ikinji gününde Ulan-Batorda ýokary derejedäki türkmen-mongol gepleşikleri geçiriler. Onuň gün tertibine ikitaraplaýyn, şeýle hem köptaraplaýyn görnüşdäki döwletara hyzmatdaşlygyň meseleleriniň giň toplumy giriziler.
Garaşylyşy ýaly, ýokary derejedäki türkmen-mongol gepleşikleriniň jemleri boýunça resminamalaryň uly toplumyna gol çekiler, bu ylalaşyklar döwletara gatnaşyklaryň şertnama-hukuk binýadyny pugtalandyrmak bilen, hyzmatdaşlygyň ägirt uly mümkinçiliklerini iş ýüzünde durmuşa geçirmäge, häzirki zaman ýagdaýlary hem-de mümkinçilikleri hasaba almak bilen, bu hyzmatdaşlyga uzak möhletleýin häsiýet berilmegine ýardam eder.
