Suwa gaçandan soň telefona zeper ýetmändigi bilen indi hiç kimi geň galdyryp bolmaz – häzirkizaman smartfon modelleri şeýle synaglardan aňsatlyk bilen baş çykarýar. Ýöne Galaxy S23 Ultra has aşa şertlerde ýokary çydamlylygy görkezdi – ol Şwesiýanyň demirgazygyndaky buzly derýada bäş sagatlap saklandy.
Waka barada şwesiýaly ýolbelet Mikael Krekula gürrüň berdi. Ol doňan Kaliks derýasynda eholotlary (gidrolokator) synagdan geçirýärkä, onuň Galaxy S23 Ultra smartfony tötänleýin elliginden sypyp, buz çukuryna gaçýar. Krekulanyň aýtmagyna görä, ol smartfony iş guraly hökmünde ulanýandygy üçin, ähli möhüm suratlary, resminamalary we programmalary hemişelik ýitirendigine ynanýardy.
Tas bäş sagatdan soň Mikael smartfony almaga synanyşdy. Ol buzda goşmaça sekiz deşik ýasap, şahalaryň, piliň we beýlekileriň kömegi bilen smartfony çykaryp bildi. Buzly suwda uzak wagt durandygyna garamazdan, telefon açyldy we bökdençsiz işlemegini dowam etdirdi.
Galaxy S23 Ultra modeliniň IP68 gorag derejesi bar – ol 30 minuta çenli wagt bilen 1,5 metre çenli çuňluga çümmäge mümkinçilik berýär. Şeýle-de, smartfon tozandan goraga eýe. Bu ýagdaýda smartfon bellenen görkezmelerden has ýokary şertlere çydady.
