Samsung tarapyndan geçirilen barlaga we Delfi agentliginiň berýän maglumatyna görä, Ýewropanyň ýaşaýjylarynyň ýarysyndan gowragy (56%) jemgyýetçilik ýerlerinde iliň telefonynyň ekranyna seredendiklerini boýun aldylar. Şol bir wagtda, sorag edilenleriň 24%-i muny, tüýs gyzyklanma sebäpli ýörite edendigini tassyklady.
Bu gelşiksiz hereketiň netijesinde şahsy suratlar we ýazgylar, şeýle hem bank maglumatlarydyr parollar başga adamlaryň gözüne ilip bilýär. Şu kysmy ýagdaýyň esasan köp bolýan ýeri hökmünde bolsa jemgyýetçilik ulaglary (57%) görkezildi.
Ýewropalylaryň 33%-i jemgyýetçilik ýerlerinde başga biriniň telefonynda şahsy mazmunly zatlary, 27%-i bolsa görmäge hiç hili haky bolmadyk zatlary-da görendiklerini aýdýarlar.
Başgalaryň ekranynda iň köp üns çekýän zatlar:
- Şahsy suratlar / galereýa — 38%;
- Wideogepleşikdäki adamyň ýüzi ýa-da sesi — 33%;
- Şahsy hatlar (meselem, ýanýoldaşyndan gelen) — 29%;
- Sosial ulgamlardaky bildirişler we profiller — 27%;
- Onlaýn söwda — 17%;
- Tanyşlyk programmalaryndaky hatlar we profiller — 12%;
- Bank hasabyndaky amallar — 11%.
Şeýlelikde, telefonyna başga biriniň gözetleýändigini duýan ulanyjylaryň tas 40%-i hasaplaşyk geçirmek ýa-da parol girizmek ýaly möhüm işlerini has ygtybarly ýagdaýa çenli yza süýşürmeli bolýarlar. Sebäbi şeýle ýagdaýa sezewar bolan adamlaryň diňe 10%-i ekranyna jyklaýan adama gönümel duýduryş berip bilýär. Galany bolsa, beýdip duranlaryndan telefony ýygnanlaryny has gowy görýärler
Samsunga bu barlagy geçirmäge düýpli esas bolan zat, ulanyjylaryň gizlinlik meseleleri boýunça aladalarynyň barha artmagydyr. Günorta Koreýanyň tehno ägirdi şu meseleden ugur alyp, ýakynda täze Galaxy S26 Ultra modelinde ekrandaky islendik zady del nazarlardan gizlejek «Privacy Display» funksiýasyny-da girizdi. Bu funksiýa ekrany gapdaldan seredýänler üçin garaldyp, hatda adamlaryň gür ýerinde-de maglumatlaryň gizlin galmagyny üpjün edýär.
