«Samsung Galaxy S26 Ultra smartfonlaryny ulanýanlar kompaniýanyň enjamy yzyna gaýtarmakdan ýüz öwren ýagdaýynda, olara 250 dollara çenli öwez puly berilýär» diýip WCCFTech neşiri ýazýar.
Ulanyjylaryň aýtmagyna görä, şeýle teklibi smartfon barada şikaýat ýa-da satyn alnan önümden närazylyk bilen kömek gullugyna ýüz tutanyňdan soň alyp bolýar. Ýöne resmi taýdan şeýle programma ýok. Gürrüň diňe müşderileri saklap galmak üçin ulanylýan aýratyn çäreler barada gidýär.
Şeýle tejribe Samsung-yň Galaxy S26 seriýasyna bolan islegiň örän ýokarydygy we deslapky sargytlaryň rekord derejededigi baradaky beýanatlaryň köplüginde geň görünýär. Kompaniýanyň özi şeýle görnüşde öwez puluň bardygyny resmi taýdan tassyklamady, şeýle hem olaryň haýsy ýurtlarda we näderejede giňden ulanylýandygyny mälim etmedi.
Seljerijiler bu görnüşli çäreleriň kompaniýanyň mobil bölümine edilýän basyş bilen bagly bolup biljekdigini çaklaýarlar. Mundan ozal girdejiniň azalmagy, amaly çykdajylaryň artmagy we çykdajylary optimallaşdyrmagyň zerurdygy barada habar berlipdi. Şeýle hem, ulanyjylar Galaxy S26 Ultra-nyň ekranynyň hilinden we göz üçin döredýän oňaýsyzlygyndan şikaýat edipdiler.
