Aýdymçy Dua Lipa Samsung kompaniýasynyň üstünden kazyýete şikaýat edip, öz suratynyň rugsatsyz telewizor gutularynda ulanylandygy üçin azyndan 15 million dollar möçberinde öwez tölegini talap etdi.
Şikaýat arzasy Kaliforniýanyň federal kazyýetine berildi. Resminamalarda aýdymçynyň suratynyň Samsung Crystal UHD telewizorlarynyň gutularynda ulanylandygy bellenilýär. Dua Lipanyň wekilleri awtorlyk hukugynyň, haryt nyşanyna bolan hukugyň we keşbi ulanmak hukugynyň bozulandygyny aýdýar.
Dua Lipanyň aklawçylarynyň pikiriçe, kompaniýa öz önümlerini mahabatlandyrmak üçin aýdymçynyň meşhurlygyndan peýdalanypdyr we onuň bu brend bilen hyzmatdaşlyk edýändigi ýa-da Samsung önümlerini goldaýandygy barada galat düşünje döredipdir.
Işiň materiallaryna görä, bu surat 2024-nji ýylda Austin City Limits aýdym-saz festiwalynyň sahna arkasynda düşürilipdir we ABŞ-nyň Awtorlyk hukugy býurosynda hasaba alnypdyr.
Şeýle-de, aýdymçynyň aklawçylary Samsung-yň kazyýetden öňki nägilelik talapnamasyny alandan soň hem suraty ulanmagy bes etmändigini öňe sürýär. Arzada Samsung telewizoryny gutusyndaky Dua Lipanyň suraty üçin satyn alandygyny ýazan sosial torlary ulanyjylaryň ýazgylary hem görkezilýär.
