Fransiýanyň “Pari Sen-Žermen” futbol kluby ilkinji gezek Çempionlar ligasynyň ýeňijisi boldy. Mýunhendäki “Alýans Arena” stadionynda geçirilen final oýnunda Luis Enrikäniň topary “Interi” 5:0 hasabynda utdy.
Hasaby 12-nji minutda parižlileriň goragçysy Aşraf Hakimi açdy. 20-nji minutda ýarymgoragçy Dezire Due toparyň artykmaçlygyny iki esse artdyrdy, 63-nji minutda bolsa ikinji goluny geçirdi. 73-nji minutda gruziýaly hüjümçi Hwiça Kwarasheliýa tapawutlandy, final nokadyny 86-njy minutda Senni Meýulýu goýdy.
Bu Çempionlar ligasynyň taryhynda iň uly ýeňiş boldy. Ozal hiç kim iň abraýly ýewrokubokda (hatda ýaryş Çempionlar kubogy diýlip atlandyrylan döwürde) bäş gol tapawut bilen ýeňiş gazanmandy.
Öz taryhynda “PSŽ” bir gezek hem Ýewropanyň esasy klub ýaryşynda ýeňiji bolmandy. 2020-nji ýylda Lissabonda geçen ýeke-täk finalynda-da topar “Bawariýadan” utulypdy (0:1).
“PSŽ” Çempionlar ligasyny utan 24-nji topar boldy. Ozal fransuz klublarynyň arasynda bu kubogy diňe “Marsel” aldy, ol 1993-nji ýylda finalda “Milany” utdy.
“PSŽ-niň” baş tälimçisi Luis Enrike ozal 2014/15 möwsüminde ispan “Barselonasynyň” başynda Çempionlar ligasynda ýeňiş gazanypdy.
“PSŽ” Fransiýanyň iň köp titully klubudyr, ol 1970-nji ýylda esaslandyryldy. Klub 13 gezek Fransiýanyň çempiony boldy, 16 gezek Fransiýanyň Kubogyny, 13 gezek Superkubogyny, dokuz gezek Fransuz ligasynyň kubogyny aldy.
