Awstraliýaly barlagçylar ölen inçeçüňk deňiz guşunyň (Ardenna tenuirostris) jüýjesiniň daşlygyndan rekord mukdarda - 778 bölek plastik galyndylaryny tapdylar. Howsala döredýän açyş barada Awstraliýanyň gündogar kenaryndaky Lord-Hau adasynda deňiz guşlaryna gözegçilik edýän alymlar habar berdi.
Daily Mail-iň habar bermegine görä, bu 80 günlük jüýjäniň maslygyndan şonça galyndy tapylypdyr.
Barlagçylar tötänden tutulan başga bir guşy gözden geçirenlerinde, onuň agramynyň bäşden bir böleginiň plastmassadan ybaratdygyny anykladylar. Şol sebäpli deňiz guşunyň sözüň doly manysynda “şagyrdap, gütürdäp” durandygy bellendi.
Deňiz guşlarynyň jüýjesi ýumurtgadan çykandan soň, 90 gün töweregi hinde ýerleşen höwürtgelerinde galýarlar. Bu wagtyň dowamynda olara ene-atalary iýmit getirip berýär.
Barlagçylar uly guşlaryň öz jüýjelerine diňe bir iýmit däl, eýsem dürli plastik galyndylary, mysal üçin, howa şarynyň, LEGO konstruktorynyň böleklerini, çüýşe gapaklaryny we beýleki zatlary hem getirýändigini bellediler.
