Volvo Cars şwed awtokompaniýasy 3 müňe golaý iş ornunyň azaldyljakdygyny mälim etdi. Bu çäre esasan-da ofis işgärlerine degişli bolar, bu bolsa ähli işgärleriň, takmynan, 15 göterimine deňdir. Häzirki wagtda kompaniýanyň ofislerinde 43,5 müň adam işleýär.
Işden boşatmalaryň köpüsiniň Şwesiýada bolmagyna garaşylýar.
Hytaýyň «Geely» awtokonsernine degişli bolan kompaniýanyň ýolbaşçylary bu ädimi çykdajylary azaltmak zerurlygy bilen düşündirdiler. Maksat – 18 milliard şwed kronuny (takmynan, 1,9 milliard dollar) tygşytlamak. Bu çäreler dünýä bazarynda bäsdeşligiň güýçlenýän döwründe çykdajylary azaltmak we netijeliligi ýokarlandyrmak boýunça giň meýilnamanyň bir bölegidir.
«Volvo Cars-yň» baş direktory Hakan Samuelson bu özgertmeleriň kompaniýanyň bazardaky ornuny güýçlendirmelidigini aýtdy.
«Awtoulag pudagy häzirki wagtda kyn döwri başdan geçirýär. Şeýle ýagdaýda biz nagt pul dolanyşygynyň görkezijileri gowulandyrmaly we çykdajylarymyzy düýpli azaltmaly» — diýip, ol aýtdy.
Şeýle kynçylyklar bilen häzirki wagtda beýleki awtoulag öndürijileri hem ýüzbe-ýüz bolýar. Durnuksyz makroykdysady ýagdaý, bäsdeşligiň artmagy hem-de ABŞ-nyň gümrük paçlaryny ýokarlandyrmagy pudaga täsir edýär.
«Volvo» 2030-njy ýyla çenli dolulygyna elektrikli awtoulaglara geçmegi maksat edinýändigini mälim eden ilkinji kompaniýalaryň biridi. Emma geçen ýyl kompaniýa bu meýilnamasyndan el çekdi.
