ABŞ-nyň hökümeti Garward uniwersitetine daşary ýurtly talyplary okuwa kabul etmegi gadagan etdi. Içerki howpsuzlyk ministrligi uniwersitete alyş-çalyş boýunça talyplary kabul etmäge mümkinçilik berýän maksatnama gatnaşmagyny haýal etmän ýatyrmak barada hat iberdi diýip, The New York Times ýazýar.
Indi Garward daşary ýurtlulara ABŞ-a talyp wizasyny almak üçin zerur bolan resminamalary berip bilmez. Garwardda eýýäm okaýan daşary ýurtly talyplar bolsa başga bir uniwersitete geçmeli bolar, ýogsam ýurtda bolmak hukugyny ýitirer.
Hökümet ilkinji gezek aprel aýynda Garwarda çäklendirmeler bilen haýbat atyp, ýokary okuw mekdebiniň ýolbaşçylygyndan daşary ýurtly talyplar tarapyndan “bikanun we zorlukly hereketler” barada hasabat bermegi talap etdi.
Munuň bilen birlikde Ak tam Garwarddan reformalary talap edipdi. Olaryň arasynda aktiwist mugallymlaryň täsirini azaltmak we “amerikan gymmatlyklaryna we institutlaryna duşmançylykly” talyplary kabul etmekden ýüz öwürmek bar. Ýokary okuw mekdebi bu şertleri ýerine ýetirmekden boýun gaçyrdy. Şondan soň hökümet uniwersitet üçin 2,2 mlrd dollar möçberindäki grantyny togtatdy.
Garwardyň ýolbaşçylygy hökümetiň hereketlerini bikanun diýip hasaplaýar.
Geçen okuw ýylynda Garwardda, uniwersitetiň maglumatlaryna görä, 7000 töweregi daşary ýurtly talyp bilim aldy. Bu okaýanlaryň umumy sanynyň 27%-inden gowragydyr.
