Ýaponiýa çagalaryň atlarynyň hytaý harplary - kandzi bilen ýazylan aýdylyşynyň täze düzgünlerini girizdi. Japan Today -iň habar bermegine görä, bu köplenç animeden we pop medeniýetden ylham alýan adaty bolmadyk we okamasy kyn aýdylyş usullaryny aradan aýyrmak üçin edildi.
Çäklendirmeler kirakira diýlip atlandyrylýan atlara degişlidir. Kirakira atlar - seýrek ýa-da toslama okalýan standart däl we döredijilik wariantlary. Iýeroglifleriň adaty bolmadyk görnüşde okalmagy ýa-da brendlere, multfilmleriň gahrymanlaryna we daşary ýurt sözlerine salgylanmagy gadagandyr.
Indi çaganyň ady bellige alnanda diňe umumy we resmi taýdan ykrar edilen okalyş usullaryny görkezmeli. Hökümetiň pikirine görä, bu mekdeplerde, hassahanalarda we beýleki döwlet edaralarynda bulaşyklygyň döremeginiň öňüni almaga kömek eder.
The Guardian gazetiniň habar bermegine görä, kirakira atlary meselesi Ýaponiýada 1990-njy ýyllardan bäri ara alnyp maslahatlaşylyp gelinýär. Resmi adamlar şeýle atlary düşündirişsiz okamak we aýtmak kyn diýip belleýärler. Çagalara Akuma ("şeýtan" diýip terjime edilýär), Pikaçu ("Pokemon" animesiniň gahrymanyndan ylhamlanyp), Naýki (Nike brendinden ylhamlanyp), Pu (Winni Puh) ýa-da Odzisama (şazada) atlarynyň dakylan ýagdaýlary boldy.
Şeýle hem, ýapon metbugaty Olimpiýa çempiony, Tokionyň Olimpiýa guramaçylyk komitetiniň başlygy Seýko Hasimotonyň çagalaryna dakan atlary bilen bagly mysaly ýatlatdy. Ol Oýunlaryň geçirilen şäherleriniň hormatyna ogullaryna Girişia (Gresiýa) we Torino (Turin) diýip at dakdy.
Ýapon dilinde kandzi hiragana we katakana bilen bir hatarda ulanylýar. Şol bir ieroglifiň birnäçe okalyşy bolup biler, bu atlar bellige alnanda kynçylyk döredýär. Täze düzgünler diňe umumy kabul edilen we düşnükli fonetik wariantlary saýlamagy talap edýär.
