Altyn bilen kümüş birden arzanlady

Gymmatbaha metallaryň bazary rekord derejedäki ösüşini bes edip, birdenem pese gaçdy. Bu barada Bloomberg agentligi habar berýär.
Gymmatbaha metallaryň arzanlamagyna ilkinji nobatda ABŞ-nyň Prezidenti Donald Trampyň administrasiýasynyň Kewin Uorşy Federal Rezerw Ulgamynyň (FRU) başlygy wezipesine hödürleýänligi baradaky habarlaryň netijesinde dollaryň güýçlenmegi sebäp boldy.
Altynyň bahasy 6% arzanlap, bir unsiýa üçin 5 000 dollara çenli düşdi, kümüş bolsa 15% (97 dollara çenli) gymmatyny ýitirdi. Platinanyň bahasy hem 10%-den gowrak peseldi. Şunuň bilen baglylykda, dollaryň indeksi 0,5% ýokarlanyp, bu bolsa metallary beýleki walýuta bilen satyn aljaklar üçin has gymmat etdi.
Kewin Uorş öňden berk pul-karz syýasatynyň tarapdary hökmünde tanalýan hem bolsa-da, soňky aýlarda ol göterim mukdaryny peseltmegi goldap, bu meselede Trampyň garaýyşlaryna ýakynlaşdy.
Seljerijileriň bellemegine görä, bazar aşa «gyzyşypdy» we peýdasyny berkitmek üçin häki bir sebäbe garaşýardy. Altynyň otnositel güýç indeksi ýakynda 90 derejesine — soňky onlarça ýylyň iň ýokary görkezijisine ýetipdi, bu bolsa bazarda aşa köp satyn almalaryň bolandygyny aňladýardy.
«OCBC» strategi Kristofer Wong bu ýagdaýy şeýle düşündirýär: «Bu hereket „tiz uçan — tiz gaçar“ diýen düzgüni tassyklaýar».
Anna güni bolan arzanlaşyklara garamazdan, geosyýasy durnuksyzlygyň täsiri bilen ýanwar aýy gymmat bahaly metallar üçin örän gowy aý boldy. Ýylyň başyndan bäri altynyň bahasy takmynan 17%, kümşüň bahasy bolsa 43% ýokarlandy.