Sisiliýadaky şäher ýeriň opurylmagy sebäpli uçudyň gyrasynda galdy

Sisiliýanyň Kaltanissetta kommunasyndaky Nişemi şäheriniň häkimiýetleri ýer süýşgüni sebäpli 1,5 müňe golaý ýaşaýjyny gyssagly ewakuasiýa etdi. Bu tebigy hadysa sebäpli şäheriň taryhy merkezi ýumrulyp biler diýip, The Guardian gazeti habar berýär.
Topragyň süýşmegi güýçli ýagyşlary getiren «Garri» siklonyndan soň başlandy. Depäniň eňňidinde uzynlygy 4 km töweregi bolan jaýryk emele geldi we ol giňelmegini dowam etdirýär.
Indi uçudyň gyrasyndan 50–70 metr uzaklykda ýerleşýän jaýlar uly howp astynda galdy. Hünärmenleriň pikiriçe, olaryň ýumrulmagy gutulgysyzdyr. Hödürlenen suratlarda binalaryň bir böleginiň eýýäm weýran bolandygy, käbir jaýlaryň we awtomobilleriň bolsa edil uçudyň üstünde durandygy görünýär.
Nişeminiň häkimi Massimiliano Konti ýagdaýyň howpludygyny aýdyp, ýaşaýjylary muňa çynlakaý çemeleşmäge çagyrdy.
«Men hiç kimiň bu waka ýeňil garamagyny islemeýärin. Bagtymyza, häzirlikçe hiç kim şikes almady, diňe jaýlara zeper ýetdi» diýip, şäher häkimi mälim etdi.
Şäheriň ilaty, takmynan, 25 müň adama barabar. Göçürilen adamlar öz garyndaşlarynyň ýanynda ýerleşdi, ýüzlerçe ýaşaýjy bolsa iki gijäni sport arenasynda geçirdi. Mekdepler ýapyldy, kenarýaka şäheri Gela barýan ýol bolsa petiklendi.
«Howadan alnan suratlarda Nişeminiň nähili weýran bolýandygy görünýär. Ýagdaý agyr, aýratyn hem, weýran bolmalaryň jatyrdy sesleri häzirem eşidilýär, ýagyş bolsa halas ediş we tehniki barlag işlerini geçirmäge päsgel berýär» diýip, Konti nygtady.
Mundan ozal Italiýanyň hökümeti «Garri» siklonyndan zyýan çeken günorta sebitlerde adatdan daşary ýagdaýy yglan edipdi. Tupan sebäpli ýeten umumy zyýan 1 milliard ýewrodan gowrak diýlip bahalandyrylýar.