ABŞ-nyň Prezidenti Donald Tramp Günorta Koreýadan getirilýän awtoulaglara we beýleki birnäçe harytlara goýulýan gümrük pajyny 15 göterimden 25 göterime çenli ýokarlandyrmak baradaky kararyny habar berdi. Bu baradaky beýannama "Truth Social" jemgyýetçilik torunda çap edildi.
Koreýa Respublikasynyň häkimiýetleri muňa jogap edip, gümrük pajlarynyň ýokarlandyrylmagy barada resmi duýduryş almandyklaryny bellediler.
Ak tamyň ýolbaşçysy öz habarynda Günorta Koreýanyň Milli Assambleýasynyň ikitaraplaýyn söwda şertnamasyny tassyklamandygyny görkezdi. Onuň aýtmagyna görä, bu ýagdaý awtoulaglara, agaç materiallaryna (pilomateriallara), derman önümlerine goýulýan nyrhlaryň, şeýle-de jogap gümrük paçlarynyň 15-den 25 göterime çenli ýokarlandyrylmagyna sebäp boldy. Tramp Günorta Koreýa "ylalaşygyň şertlerini ýerine ýetirmeýär" diýip hasaplaýar.
Koreýa Respublikasynyň hökümeti resmi beýannama bilen çykyş edip, gümrük nyrhlary boýunça öň gazanylan ylalaşyklara eýermäge taýýardygyny nygtady.
Günorta Koreýanyň lideriniň administrasiýasynyň beýannamasynda: "Ýokarlandyrylan gümrük paçlarynyň güýje girmegi üçin federal reýestrde çap edilmek ýaly dolandyryş çäreleri gerek bolany sebäpli, biziň hökümetimiz gümrük pajlary boýunça ylalaşyklary ýerine ýetirmäge taýýardygyny ABŞ-nyň dykgatyna ýetirmegi meýilleşdirýär we bu ýagdaýa sabyrlylyk bilen çemeleşer" diýlip bellenilýär.
Şeýle hem Günorta Koreýanyň senagat we söwda ministri Kim Çžon Gwanyň gepleşikleri geçirmek üçin ABŞ-a ugramagy meýilleşdirýändigi habar berilýär.
Geçen ýylyň tomsunda Waşington we Seul söwda hyzmatdaşlygy barada ylalaşypdylar, güýzde bolsa onuň şertlerini tassykladylar. Günorta Koreýa ABŞ-nyň ykdysadyýetine 350 milliard dollar maýa goýmagy meýilleşdirýändigini, onuň 200 milliardynyň göni maýa goýum, 150 milliardynyň bolsa gämi gurluşygy pudagyndaky hyzmatdaşlyk çäklerinde bolmalydygyny mälim edipdi. Maýa goýumlaryň ýyllyk çägi 20 milliard dollar derejesinde bellenilipdi. Öz gezeginde, ABŞ günorta koreý awtoulaglaryna goýulýan gümrük pajyny 25-den 15 göterime çenli aşaklatmaga razy bolupdy.
