Audi emeli aňy önümçilik we logistika işlerine işjeň ornaşdyryp başlady. Häzirki wagtda kompaniýa awtomobil ýygnamak işini tizleşdirmäge, hili ýokarlandyrmaga we wagty tygşytlamaga gönükdirilen 100-den gowrak taslamany durmuşa geçirýär.
Audi-niň ýolbaşçylarynyň biri Gert Wokeriň aýtmagyna görä, EA has netijeli önümçilik gurşawyny döretmekde esasy gurala öwrüldi.
Taslamalaryň biri – Tender Toucan – tender wagty arzalary çalt gaýtadan işlemäge kömek edip, wagty 30% azaldýar. Şeýle-de, IRIS we WSD algoritmleri ulanylýar. IRIS ulgamy awtomobillerde tehniki maglumatlaryň dogry ýazylandygyny barlaýar, bu hem zawodda wagty tygşytlap, ýalňyşlyklaryň sanyny azaldýar. WSD algoritmi kebşirleme hilini barlap, kemçilikleri ýüze çykarmaga we olary düzetmäge kömek edýär. Bu diňe bir önümiň hilini ýokarlandyrman, eýsem önümçilikde howpsuzlygy üpjün edýär.
Audi emeli aňyň öz kärhanalarynda ulanylyş gerimini giňeltmegi meýilleşdirýär. Kompaniýa Germaniýadaky Innovation Park Artificial Intelligence (IPAI) bilen hyzmatdaşlyk edýär. Bu hyzmatdaşlyk awtoulag senagatynda täze EA çözgütlerini ösdürmäge we durmuşa geçirmäge gönükdirilendir.
Kompaniýanyň aýtmagyna görä, şeýle başlangyçlar önümçiligi has durnukly, tehnologiki taýdan ösen we bäsdeşlige ukyply etmäge mümkinçilik berýär. Audi diňe bir döwrebap awtomobilleri döretmäge däl, eýsem olaryň önümçiliginde öňdebaryjy usullary ulanmaga çalyşýar.
