Hajyň öňüsyrasynda Mekgedäki Al-Haram metjidinde Manara atly gumanoid robot peýda boldy. Ol zyýaratçylary ugrukdyrmaga kömek edip, arap, iňlis, urdu, bengal we malaýýa ýaly 11 dilde soraglara jogap berýär.
2025-nji ýylda haj möwsümi 4 – 9-njy iýunda geçirilýär. Şäheriň iň uly metjidinde zyýaratçylaryň köp bolmagyna garaşylýar we şonuň üçin häkimiýetler amatlylygy we howpsuzlygy ýokarlandyrmak üçin tehnologiýalary öňünden ornaşdyrýar.
Manara dini gurşawy sanlaşdyrmak boýunça milli maksatnamanyň bir bölegidir. Robot däp-dessurlaryň kadalaryny düşündirýär, ybadathanada özüňi nähili alyp barmalydygyny we ybadat etmegiň ähmiýetini gürrüň berýär. Kyn sorag ýüze çykanda ol adamy wideoaragatnaşyk arkaly ruhy halypa bilen baglanyşdyrýar.
Robot sensor ekran, kameralar, mikrofon, dinamikler we nawigasiýa ulgamy bilen enjamlaşdyryldy. Manara dört tigirde hereket edýär we adamlaryň hereketine päsgel bermeýär. Onda 5G ulgamy ulanylýar, bu hem robota çalt jogap bermäge mümkinçilik berýär.
Manara interýer bilen utgaşar ýaly adaty nagyşlar bilen bezeldi.
Mundan başga-da, Mekgede mähellä gözegçilik etmek we hereketi düzgünleşdirmek üçin emeli aňly datçikler we kameralar gurnaldy. Şeýle-de, häkimiýetler elektron bilezikler, nawigasiýa programmalary, namaz okamagyň tertibi bilen wirtual kömekçiler ýaly sanly çözgütleri hödürleýär.
Ozal Saud Arabystanynda Sara atly başga bir robot hödürlendi. Ol ýüzi tanaýar, arap we iňlis dillerinde gürleýär, myhmanlara we ýerli ýaşaýjylara aragatnaşyk saklamaga kömek edýär.
Bu çäreleriň ählisi ýurduň tehnologiki ösüşine we ýaşaýyş hilini ýokarlandyrmaga gönükdirilen “Görüş 2030” strategiýasynyň bir bölegidir.
