«Xiaomi» kompaniýasy birinji çärýek boýunça maliýe netijelerini çap etdi. Kompaniýanyň umumy girdejisi 111,3 mlrd ýuana (15,4 mlrd dollara) ýetip, geçen ýyl bilen deňeşdirilende 47% köpeldi. Arassa girdeji bolsa 64,5% ýokarlanyp, 1,48 mlrd dollara ýetdi.
Ylmy-barlag we ösüş üçin çykdajylar 30,3% artyp, 930 mln dollara ýetdi. Kompaniýanyň işgärleriniň 47,7%-i ylmy-barlag işleriniň ugrunda işleýär. «Xiaomi» dünýä boýunça 43 müňden gowrak patentiň eýesidir.
Esasy ugurlar, ýagny smartfonlar we zatlaryň emeli aňy (AIoT) 12,8 mlrd dollar girdeji getirdi, bu geçen ýylyň birinji çärýegi bilen deňeşdirilende 22% köpdür. Mart aýynda işjeň smartfon we planşet ulanyjylarynyň sany 718,8 mln bolup, 9,2% ösüş gazanyldy.
«Xiaomi» 19 çärýek bäri, smartfon ibermekde dünýädäki iň öňdebaryjy üç kompaniýanyň biri bolup gelýär. Hytaýda bolsa birinji orny eýeleýär. Planşet pudagynda kompaniýa 3,1 mln enjam iberdi we bazar paýy 8,3%-e ýetdi.
Şeýle hem «Xiaomi» ýanwardan marta çenli aralykda dakylýan enjamlar pudagynda dünýä boýunça birinji orny eýeledi. IoT (zatlaryň internedi) enjamlarynyň sany (smartfonlary, planşetleri we noutbuklary hasaba almazdan) 943,7 mln-a ýetdi. Ýurt boýunça kompaniýa 1000-den gowrak täze oflaýn dükan açdy.
Kompaniýa «Xring O1» çibiniň işlenip düzülişine 1,87 mlrd dollar maýa goýdy. Bu çip «Xiaomi 15S Pro» smartfonynda we «Pad 7 Ultra» planşetinde ulanylar. «Xiaomi» Hytaýda flagman bazarynyň, takmynan, 25%-ine eýelik edýär.
Elektromobil bölüminiň girdejisi 2,5 mlrd dollar boldy. Çärýekde 75 müň 869 sany «SU7» elektrokar öndürildi. Bu model boýunça umumy ibermeler 258 müňden geçdi. Ozal habar berşimiz ýaly, bu ýagdaý «Xiaomi» kompaniýasyna her satuwdan gelýän zyýany 7 esse azaltmaga mümkinçilik berdi. «Xiaomi Auto» öňümizdäki aýlarda girdeji gazanyp başlar diýlip garaşylýar.
