Xiaomi 2025-nji ýylyň birinji çärýegi üçin maliýe hasabatyny hödürledi. Üç aýda SU7 modelinden 75 869 elektromobil ýola goýuldy, bu modeliň umumy üpjünçiligi bolsa 258 000 birlikden geçdi. Şeýle-de, kompaniýa önümçilik kuwwatyny giňeltmek meýilnamalary barada habar berdi.
Intellektual elektromobiller we EA segmentiniň girdejisi 18,6 mlrd ýuan (2,58 mlrd ABŞ dollary) boldy we şolardan 18,1 mlrd ýuan (2,51 mlrd dollar) elektromobil satuwynyň paýyna düşdi. Galan 500 mln ýuany (70 mln dollar) beýleki ugurlar üpjün etdi.
Awtomobil we EA segmentinde jemi girdeji 23,2% boldy. Şol bir wagtyň özünde, 500 mln ýuan (70 mln dollar) möçberde operasion ýitgi hasaba alyndy. Bu bir ulag üçin ortaça 6500 ýuan möçberde (takmynan, 903 dollar) ýitgini aňladýar. Bir ýyl ozal bu görkeziji bir ulag üçin, takmynan, 45 000 ýuan (6250 dollar) bolupdy.
Ozal Xiaomi Group-yň prezidenti Lu Weýbing awtomobil öndürmek işiniň başlangyç tapgyrdadygyny aýdypdy. Ol ilkibaşdaky uly maýa goýumlaryň we hususy zawod gurluşygynyň häzirlikçe ýitgilere getirýändigini, ýöne üpjünçiligiň göwrüminiň artmagy bilen ýitginiň azaljakdygyny belledi.
Kompaniýanyň çaklamalaryna görä, awtomobil ugry eýýäm 2025-nji ýylyň ikinji çärýeginde ýitgisizlik derejesine çykyp ýa-da girdeji getirip biler.
