“Ahyrky nokat: Gan baglanyşygy” (Пункт назначения: Узы крови) filmi meşhur horror-franşizanyň iň girdejili bölümi boldy. Filmiň dünýädäki kassa ýygymy 189 mln dollardan geçdi. Muny BoxOfficeMojo portalynyň maglumatlary delillendirýär.
Franşizanyň altynjy bölümi 16-njy maýda dünýä prokatyna çykdy. Bu döwürde film ABŞ-da 96,9 mln dollar we daşary ýurtlarda 92,6 mln dollar ýygnady.
Bloody Disgusting-iň maglumatlaryna görä, öňki rekord 186,1 mln dollar ýygnan “Ahyrky nokat 4” (2009) filmine degişlidi. Üçünji orunda – 157,8 mln dollar bilen “Ahyrky nokat 5” (2011) ýerleşýär.
Ilkinji üç bölümiň kassa ýygymy 112,8 mln dollar (2000), 90,9 mln dollar (2003) we 118,8 mln dollar (2006) boldy.
Täze bölümiň sýužeti talyp gyz Stefaniniň töwereginde ýaýbaňlanýar. Ol ölüm zynjyryny üzüp, maşgalasyny halas edip biljek adamy tapmaga synanyşýar.
Kassa üstünliginden başga-da, “Gan baglanyşygy” tankytçylardan ýokary baha aldy. Rotten Tomatoes saýtynda film hünärmen tankytçylardan 92% we tomaşaçylardan 88% oňyn ses aldy – bu ähli bölümleriň arasynda iň gowy görkezijilerdir.
Täze bölümiň režissýorlary Zak Lipowski we Adam Steýn boldy.
