Britaniýanyň Vertical Aerospace kompaniýasy Ýewropada açyk howa giňişliginde ilkinji gezek howa taksisiniň uçuşyny amala aşyrdy. Bu barada The Daily Telegraph gazeti habar berýär.
VX4 elektrouçarynyň prototipi Angliýanyň gündogar-günbataryndaky Kotsuolds sebitiniň asmanyna göterildi. Bat almak üçin ýerli howa menziliniň uçuş-gonuş zolagy ulanyldy. Uçuş uçarman Saýmon Dewisiň dolandyrmagynda geçirildi. Neşiriň maglumatlaryna görä, indiki synag dik uçuşy görkezmegi we hemişelik tizlik bilen kese uçuş režimine geçmegi göz öňünde tutýar.
Ozal Beýik Britaniýanyň ulag ministriniň orunbasary Maýk Keýn Palatanyň deputatlaryna hökümetiň 2028-nji ýyla çenli howa taksilerini ornaşdyrmagy meýilleşdirýändigini habar berdi.
Neşiriň maglumatlaryna görä, VX4-üň işlenip taýýarlanmagy millionlarça maýa goýumlar görnüşinde döwlet goldawyny aldy. Uçar dört ýolagçyny gatnatmak üçin niýetlenendir. Ol 160 km çenli uçmaga we tizligini 240 km/sag çenli artdyrmaga ukyply.
Vertical Aerospace işewür Stiwen Fispatrik tarapyndan esaslandyryldy. Şeýle-de, ol OVO Energy kompaniýasynyň esaslandyryjysy bolup, öň Manor Racing awtoýaryş toparyna-da eýeçilik etdi. 2025-nji ýylyň başynda Fispatrik firmanyň gözegçiligini Mudrick Capital maýa goýum gaznasyna berdi. Gazna maliýe kynçylyklaryny başdan geçirýän startapy goldamak üçin taslama 50 mln funt ($70 mln) maýa goýdy.
