Täze «BMW M5» («G90» kuzowly) modeliniň agramynyň artmagy köp sanly jedelleri döretdi. Awtoulagyň Ýewropa bazary üçin niýetlenen wersiýasynyň agramy 2435 kg, bu bolsa öňki nesil «M5 Competition» («F90») bilen deňeşdirilende, 540 kg has agyr. Köpler şeýle uly tapawudyň sebäbini bilmek islediler.
Esasy sebäp, ulagyň plagin gibrid ulgama (PHEV) geçmegi bolupdyr. «BMW M» bölümine ýolbaşçylyk edýän Frank wan Mil bu çözgüdiň Ýewropadaky CO₂ zyňyndylaryna goýlan salgyt düzgünleri bilen baglanyşyklydygyny düşündirdi. Şol kadalar benzinli awtoulaglary has gymmat edip, olaryň elýeterliligini peseldýär, gibridler bolsa zyňyndylary azaldyp, salgyt ýüküni ýeňilleşdirýär.
Gibrid ulgam 197 at güýji bolan elektrohereketlendirijiden we 18,6 kWt·sag sygymly batareýadan ybarat. Elektrikli režimde ulag WLTP aýlawyna görä, 69 km çenli ýol geçip bilýär.
Batareýa kuzowyň aşagynda ýerleşdirilen, bu bolsa agyrlyk merkezini peseldýär we öwrümlerde burulmany azaltmaga kömek edýär. Mundan başga-da, täze modeliň koleýasy giňeldilen, asma ulgamy täzelenen we yzky tekerleri dolandyrmak ulgamy goşulan.
Agramyň artandygyna garamazdan, täze «M5» öňki «F90» modeli bilen deňeşdirilende has gowy dinamiki häsiýetleri görkezýär. Şol bir wagtyň özünde bolsa, ekologiýa laýyk we şäher şertlerine uýgunlaşdyrylan.
