Hytaýyň Guandun prowinsiýasynyň Şençžen şäherinde ilkinji gezek adam şekilli robotlaryň söweş çempionaty geçiriler. «EngineAI Robot Free Combat Tournament: "Mecha King"» atly ýaryş robotehnika pudagynda möhüm ädim bolup, emeli aňyň mümkinçiliklerini barlamaga we robotlaryň önümçilige giňden ornaşdyrylmagyna gönükdirilendir diýip, «Global Times» habar berýär.
Guramaçylaryň bellemegine görä, ýaryş robotlaryň fiziki mümkinçiliklerini we akyl taýdan çylşyrymly ýagdaýlara düşüniş ukyplaryny synar. Ýaryşda adam hereketlerini gaýtalamaga we ýerinde çalt çözgüt tapmaga esaslanýan täze düzgünler ulanylar.
Ýaryşa ýerli «EngineAI» kompaniýasy tarapyndan birnäçe adam şekilli robot modelleri hödürlener. Kompaniýa robotlaryň programma üpjünçiligini açyk ýagdaýda saklar, bu bolsa ýaryşa gatnaşýan toparlara öz robotlaryny sazlamaga we ösdürmäge mümkinçilik berer.
Kompaniýanyň esaslandyryjylaryndan Ýao Aýwen bu ýaryşyň maksadynyň güýçli, çeýe we akylly robotlary döretmekdigini aýtdy. Onuň pikirine görä, şeýle çäreler robotlaryň gündelik durmuşda we senagatda giňden peýdalanylmagyna ýol açar.
Ýeri gelende aýtsak, 25-nji maýda Çžeszýan prowinsiýasynyň Hançžou şäherinde adam şekilli robotlaryň gatnaşmagynda söweş sungaty boýunça halkara ýaryş geçirildi. Bu ýaryşda robotlar dürli göreş tilsimlerini görkezdiler. Ýaryşyň esasy hyzmatdaşlarynyň biri «Unitree Robotics» kompaniýasy boldy.
Şeýle ýaryşlar Hytaýda robotehnikanyň çalt ösýändigini görkezýär. Resmi maglumatlara görä, diňe Hançžou şäherinde 200-den gowrak robotehnika kompaniýasy işleýär. 2024-nji ýylda Guandun prowinsiýasynda öndürilen senagat robotlarynyň sany 240 müňden geçip, ýyllyk 31% ösüş görkezipdir. «Xinhua» agentliginiň berýän maglumatlaryna görä, Hytaýdaky her üç senagat robotynyň biri şu prowinsiýada öndürilýär.
