Türkmenistanyň saglygy goraýyş we derman senagaty ministri Myrat Mämmedow Bütindünýä saglygy goraýyş assambleýasynyň Ženewada geçirilen 78-nji mejlisine gatnaşdy. Bu barada Türkmenistanyň DIM-niň metbugat gullugy habar berýär.
Assambleýanyň umumy mejlisinde ählumumy raýdaşlygyň zerurdygyny nygtaýan pandemiýa taýýarlygy we jogap çäreleri boýunça möhüm Jarnama kabul edildi.
Ministr M.Mämmedow öz çykyşynda başlangyç lukmançylyk-sanitariýa kömegini ösdürmek, saglygy goraýyş işgärleriniň işini kämilleşdirmek, sanlylaşdyrmak we adatdan daşary ýagdaýlara taýýarlyk ýaly esasy ugurlara ünsi çekip, saglygy goraýyşda durnukly ösüşi gazanmakda Türkmenistanyň goşandyny belledi.
Saparyň çäklerinde M.Mämmedow BSGG-niň Baş müdiri doktor Tedros Adhan Gebreýsus bilen duşuşdy. Taraplar ikitaraplaýyn hyzmatdaşlygyň oňyn dinamikasyny hem-de ýokanç däl keselleriň öňüni almak we lukmançylyk bilimini ösdürmek ýaly jemgyýetçilik saglygy goraýyş ulgamynda Türkmenistanyň başlangyçlaryny ara alyp maslahatlaşdylar.
M.Mämmedow 2025-nji ýylyň 12-nji dekabrynda bellenip geçiljek Türkmenistanyň Bitaraplygynyň 30 ýyllygyna bagyşlanan çärelere gatnaşmak üçin Bütindünýä Saglygy Goraýyş Guramasynyň Baş müdirine türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň resmi çakylygyny gowşurdy.
Doktor Tedros Adhan Gebreýsus, BMG-nyň 2025-nji ýyly Halkara parahatçylyk we ynanyşmak ýyly diýip yglan edýän kararynyň kabul edilmegi bilen gutlady hem-de geljekde hyzmatdaşlygy has-da berkitmäge taýýardygyny aýtdy.
Mundan başga-da, M.Mämmedowyň BSGG-niň Ýewropa sebitleýin edarasynyň direktory doktor Hans Klýuge bilen duşuşygy geçirildi. Duşuşygyň barşynda ikitaraplaýyn hyzmatdaşlyk meseleleri ara alnyp maslahatlaşyldy hem-de Bitaraplygyň 30 ýyllygyna we Türkmenistanyň Saglygy goraýyş işgärleriniň gününe bagyşlanan bilelikdäki çäreler barada pikir alşyldy. Taraplar sebitdäki milli saglygy goraýyş ulgamlarynyň netijeliligini ýokarlandyrmak üçin hyzmatdaşlygy giňeltmäge ymtylýandyklaryny tassykladylar.
