Prezident Serdar Berdimuhamedow Türkmenistanyň orta mekdepleriniň uçurymlaryny, mugallymlaryny we ähli bilim işgärlerini «Soňky jaň» dabarasy bilen gutlady.
"Siz türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň öňdengörüjilikli beýik başlangyjy bilen işlenip taýýarlanan «Türkmenistanda on iki ýyllyk umumy orta bilime geçmegiň Konsepsiýasy» esasynda 12 ýyllyk okuw maksatnamalary boýunça bilim alan ilkinji uçurymlar bolup durýarsyňyz. Bu geçen döwrüň içinde milli bilim ulgamyny dünýä ölçeglerine, umumy ykrar edilen halkara kadalara laýyklykda kämilleşdirmek ugrunda toplumlaýyn işler amala aşyryldy. Size okatmagyň öňdebaryjy usullary, ylmyň gazananlary hem-de innowasion tehnologiýalar arkaly döwrebap bilim berildi. Siziň okan döwrüňizde halkara bilim bäsleşiklerinde gazanan uly üstünlikleriňiz Watanymyzyň abraýydyr, biziň alyp barýan bilim özgertmelerimiziň ajaýyp miweleridir" diýip, döwlet Baştutany belleýär.
Döwlet Baştutany Bitarap Watanymyzyň ähli ýerlerinde döwrebap çagalar baglaryny, orta mekdepleri gurup, ýaş nesillerimiziň ýokary hilli bilim almagy we sagdyn ösmegi üçin oňaýly şertleri döretmek ugrundaky işleriň depgininiň has-da güýçlendiriljekdigini aýtdy. Şeýle hem mugallymlaryň döredijilikli zähmet çekmegi üçin ähli amatly mümkinçilikleri dörederip, olaryň ýaşaýyş-durmuş derejesini has-da ýokarlandyrmak barada yzygiderli alada ediljekdigini belledi.
Gutlagynyň ahyrynda Serdar Berdimuhamedow berk jan saglyk, abadan we bagtyýar durmuş, berkarar Watanymyzyň mundan beýläk-de gülläp ösmegi ugrunda alyp barýan işlerinde hem-de okuwlarynda uly üstünlikleri arzuw etdi.
