21-nji maýda Türkmenistanyň Belarus Respublikasyndaky ilçihanasynyň guramagynda Belarus döwlet lukmançylyk uniwersitetinde Türkmenistanyň ilçisi N.Şagulýew bilen ýurduň ýokary okuw mekdeplerinde bilim alýan türkmen talyplarynyň arasynda duşuşyk geçirildi. Bu barada Türkmenistanyň DIM-niň metbugat gullugy habar berýär.
Çäräniň öňüsyrasynda ilçi N.Şagulýew bilen Belarus döwlet lukmançylyk uniwersitetiniň rektory, professor S.P.Rubnikowiçiň arasynda duşuşyk geçirildi. Taraplar ylym-bilim pudagynda netijeli hyzmatdaşlygy ösdürmek bilen baglanyşykly meseleleriň giň toplumyny ara alyp maslahatlaşdylar. Türkmen talyplary üçin okuw prosesiniň hiline, Belarus Respublikasyndaky ýaşaýyş şertlerine we iki ýurduň bilim edaralarynyň arasyndaky hyzmatdaşlygy mundan beýläk hem çuňlaşdyrmagyň geljegine aýratyn üns berildi.
Dabaraly çärä rektoratyň wekilleri, uniwersitetiň professor-mugallymlary we talyp ýaşlary hem-de Türkmenistanyň Belarus Respublikasyndaky ilçihanasynyň işgärleri gatnaşdylar.
Duşuşygy gutlag sözleri bilen açmak bilen, Belarus döwlet lukmançylyk uniwersitetiniň Halkara gatnaşyklary boýunça prorektory, professor W.W.Rudenok hem-de Türkmenistanyň Belarus Respublikasyndaky ilçisi N.Şagulyýew çykyş etdiler.
Ilçi N.Şagulýew talyplar bilen duşuşyk geçirip, onuň dowamynda Türkmenistanyň gülläp ösmegine mynasyp goşant goşup biljek ökde hünärmenleri taýýarlamakda aýratyn orun eýeleýän ýaş nesilde ýokary ahlak häsiýetleriniň, watançylyk duýgusynyň kemala gelmegine we şahsyýetiň sazlaşykly ösmegine aýratyn ünsi çekdi.
Duşuşygyň barşynda tomaşaçylara Türkmenistanyň Belarus Respublikasyndaky ilçihanasy tarapyndan taýýarlanan tematiki wideoşekiller hödürlenildi.
