MrBeast lakamy bilen tanalýan 27 ýaşly YouTube blogeri Jimmi Donaldson baýlygyny öz taslamalarynyň kömegi bilen gazanan dünýäde iň ýaş milliarder boldy.
Blogeriň baýlygy 1 mlrd dollar diýlip hasaplanylýar, aýlyk girdeji bolsa, takmynan, 50 mln dollara barabar.
Donaldson karýerasyna YouTube-dan başlady. Ol 2017-nji ýylda 44 sagadyň dowamynda 100 000-e çenli sanap görkezýän wideosy bilen meşhur boldy. Bu wideo 31 milliondan gowrak tomaşa ýygnady.
Soňra ol YouTube-dan daşary hem taslamalaryny ösdürip başlady. Olaryň arasynda Feastables şokolad brendi, Beast Games şüweleňi we hususy haryt hatary bar. Şeýle-de, bloger striming boýunça Amazon bilen hyzmatdaşlyga başlamagy meýilleşdirýär diýip, Benzinga neşiri ýazýar.
Forbes-iň maglumatlaryna görä, 2024-nji ýylda onuň girdejisi 85 mln dollar boldy. Ýöne MrBeast Burgers taslamasy boýunça kazyýet resminamalary onuň 2023-nji ýylda 223 mln dollar, 2024-nji ýylda 700 mln dollar gazanandygyny görkezdi.
Donaldsonyň asly Demirgazyk Karolinadan. Ol heniz ýetginjek wagty oýun wideolaryny düşürip başlady. Bloger haýyr-sahawat bilen hem işjeň meşgullanýar.
