78-nji Kann kinofestiwalynyň “Altyn palma şahasyny” eýranly režissýor Jafar Panahiniň “Ýönekeý bir tötänlik” (Простая случайность) filmi aldy. Bu barada festiwalyň ýapylyş dabarasynda yglan edildi.
“Ýönekeý bir tötänlik” pidalaryň we jellatlaryň arasyndaky gatnaşyk baradaky wakadyr. The Hollywood Reporter-iň ýazmagyna görä, sýužet eýranly režissýoryň öz tussaghana tejribesine esaslanýar. Gahryman – boşadylan dissident – nätänyş biriniň özüniň tussaghanadaky sütemkärleriniň biridigini tanaýar we ar almak isleýär, ýöne soň täze zorluk – “adalata tarap ýolmy?” diýen sorag bilen ýüzlenýär.
Bu iň tanymal eýranly režissýorlaryň biri bolan Panahi üçin ilkinji “palma” boldy. Ozal ol Berlindäki we Wenesiýadaky kinofestiwallarda baş baýraklary alypdy. Şeýlelikde, Panahi dünýäniň üç esasy kino baýragyna mynasyp bolan az sanly režissýorlaryň hataryna girdi. Ondan öň “Altyn palma şahasyny”, “Altyn aýyny” we “Altyn ýolbarsy” almak Robert Oltmene we Mikelanjelo Antonionä başardypdy.
Festiwalyň Gran-prisini daniýaly režissýor Ýoakim Trieriň “Duýgy gymmatlygy” (Сентиментальная ценность) filmi aldy. Iň gowy režissýorlyk üçin baýraga “Gizlin agent” (Секретный агент) filmi üçin braziliýaly Kleber Mendonsa Filýo mynasyp boldy. Iň gowy ssenariý üçin Žan-Pýer we Lýuk Dardennler (“Ýaş eneler”/Молодые матери) sylaglandy.
Iň gowy aktýor diýlip “Gizlin agentdäki” keşbi üçin Wagner Moura ykrar edildi. Iň gowy zenan keşbi üçin baýrak Afsiýa Ýerziniň “Kiçi uýa” (Младшая сестра) filmindäki işi üçin Nadýa Mellitä berildi.
Eminleriň baýragyny Oliwer Laşeniň (Fransiýa) “Sirat” (Сират) we Maşa Şilinskiniň (Germaniýa) “Ýykylmagyň sesi” (Звук падения) filmleri paýlaşdy.
Bäsleşige 22 film gatnaşdy. Festiwalyň ýapylyş güni Fransiýanyň Alpes-Maritimes departamentinde, şol sanda Kannda elektrik energiýasy öçdi. Ýerli häkimiýetler blekauta getiren energetika desgalaryna bilkastlaýyn zeper ýetirilmegini derňeýär. Muňa garamazdan, ýapylyş dabarasy meýilnama boýunça geçirildi – Festiwallar köşgi awtonom elektrik üpjünçiligi bilen işledi.
