Dünýäniň dürli ýurtlaryndan ogurlanan iPhone smartfonlarynyň köpüsi ahyrynda Hytaýyň Şençžen şäherindäki bir bina gelip düşýär. Muny derňewleriň netijesinde Financial Times-yň žurnalistleri anyklady.
Gürrüň Huasýanbeý sebitindäki ünsi çekmeýän Feiyang Times binasy barada gidýär. Neşiriň maglumatlaryna görä, bu bina ogurlanan Apple enjamlaryny gaýtadan satmagyň global zynjyrynda möhüm ýer bolup hyzmat edýär. Žurnalistlere iPhone 15 Pro-sy ogurlanan londonly telekeçi Sem Amraniniň smartfonynyň ýoluny yzarlamak başartdy. Smartfony elektrowelosipedli iki erkek adam onuň elinden çekip aldy. “Lokator” funksiýasynyň kömegi bilen ol telefonyň ýoluny tas 10 müň km çenli yzarlady.
Ilkibaşda iPhone Londondaky gizlin ussahana düşdi, soňra şäherde bir ýerden başga ýere göçüp, bir hepdeden Gonkonga bardy. Şol ýerden hem smartfon Şençžene äkidildi we ol Feiyang Times binasynda “ornaşdy”.
Neşiriň maglumatlaryna görä, bu binanyň dördünji gaty Ýewropadan we ABŞ-dan ulanylan iPhone-lary satmaga ýöriteleşendir. Käbir gurluşlar bu ýere açyk ýagdaýda, mysal üçin, model çalşylanda alyjylar tarapyndan smartfonlaryň yzyna gaýtarylmagy arkaly düşýär. Şeýle-de, bu ýere ogurlanan gajetler hem gelýär we olary sosial ulgamlarda bir topara birleşen adamlar satýar we satyn alýar.
Hatda blokirlenen telefonlar üçin hem alyjy tapylýar – olary komponentler üçin satyn alýarlar. Satyjylar smartfonlaryň özlerine nädip düşýändigini bilmeýändigini aýdýar.
Neşiriň hasaplamasy boýunça, Londonda ogurlanan smartfonlaryň gizlin bazarynda ýyllyk dolanyşyk 65,5 mln dollar diýlip çaklanylýar. Parižde we Nýu-Ýorkda hem görkezijiler şeýle.
