Italiýanyň futbol boýunça çempionatynda soňky tapgyryň aýgytly oýunlary oýnaldy we olaryň netijesinde “Napoli” ýaryşyň ýeňijisi boldy.
38-nji tapgyrdan öň “Napoli” “Interden” bir utuk öňde barýardy. Anna güni toparlaryň ikisi-de jemleýji oýunlaryny oýnady. “Komo” – “Inter” duşuşygy ikinjiniň peýdasyna 0:2 hasabynda tamamlandy. Gol bilen Stefan de Wreý (20-nji minut) we Hoakin Korrea (51-nji minut) tapawutlandy.
“Napoli” ahyrky oýunda “Kalýari” bilen oýnady we duşuşyk “Napoliniň” peýdasyna 2:0 hasabynda tamamlandy. Gollary Skott Maktomineý (42-nji minut) we Romnelu Lukaku (51) geçirdi.
Şeýlelikde, “Napoli” 82 utuk gazanyp, ýaryş jedwelinde birinji orny eýeledi. Ol “Interden” bir utuk öňe geçdi. Netijede, “Napoli” Italiýanyň çempionatynyň ýeňijisi boldy.
Klub soňky üç ýylda ikinji gezek we taryhynda dördünji gezek (1987, 1990, 2023, 2025) Italiýanyň çempiony titulyny aldy. Geçen ýyl topar Seriýa A-da onunjy orny eýeläpdi, şondan soň tomusda topara Antonio Konte tälimçi boldy. Hünärmen “Ýuwentusy” üç çempionlyk titulyna getirip, 2020/21 möwsüminde “Inter” bilen ýeňiş gazanypdy.
“Inter” çempionatda 20 gezek, şol sanda geçen ýyl ýeňiji boldy. Topara 2021-nji ýylyň iýunyndan bäri Simone Indzagi ýolbaşçylyk edýär.
