20-nji maýda Türkmenistanyň Bilim ministrliginde halkara ders bäsleşikleriniň ýeňijilerini sylaglamak dabarasy boldy.
4–12-nji maý aralygynda Saud Arabystany Patyşalygynyň Dahran şäherinde geçirilen fizika boýunça 25-nji Aziýa olimpiadasynda (APhO-2025) ýurdumyzyň mekdep okuwçylarynyň üçüsi tapawutlandylar. Mary welaýatynyň Wekilbazar etrabyndaky 5-nji orta mekdebiň 12-nji synp okuwçysy Mähriban Kakamyradowa kümüş medaly eýeledi. Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň 11-nji synp okuwçysy Jumadurdy Nuryýew hem-de Mary welaýatynyň Sakarçäge etrabynyň Şatlyk şäherçesindäki takyk we tebigy ugurlara ýöriteleşdirilen 43-nji orta mekdebiň 11-nji synp okuwçysy Döwlet Annamyradow höweslendiriji baýraklary aldylar.
Braziliýanyň Belu-Orizonti şäherinde 5–13-nji maý aralygynda geçirilen 59-njy halkara Mendeleýew olimpiadasynyň netijeleri boýunça Aşgabat şäherindäki Saparmyrat Türkmenbaşy adyndaky ýöriteleşdirilen umumybilim berýän mekdep-internatynyň okuwçylary: 11-nji synp okuwçysy Rüstem Jumaýew kümüş medal, 11-nji synp okuwçysy Diýar Döwletow, 12-nji synp okuwçylary Aýgül Atajanowa we Jeren Akmyradowa bürünç medallary gazanyp, baýrak eýeleriniň hataryna girdiler.
7–13-nji maý aralygynda Özbegistanyň Daşkent şäherinde geçirilen Al-Horezmi adyndaky matematika we informatika boýunça 3-nji halkara olimpiadasynda Türkmenistanyň ýaş zehinleri jemi 12 medal – 1 altyn, 3 kümüş we 8 bürünç medallary eýelediler.
Matematika boýunça altyn medala Aşgabat şäherindäki iňlis dili, himiýa we biologiýa derslerini çuňlaşdyryp öwredýän ýöriteleşdirilen 86-njy orta mekdebiň 9-njy synp okuwçysy Hemra Gurbanow mynasyp boldy.
Aşgabat şäherindäki iňlis dilini çuňlaşdyryp öwredýän ýöriteleşdirilen 87-nji orta mekdebiň 9-njy synp okuwçysy Ýusup Resulow, Aşgabat şäherindäki iňlis dilini çuňlaşdyryp öwredýän ýöriteleşdirilen 83-nji orta mekdebiň 9-njy synp okuwçysy Omar Döwranow hem-de Aşgabat şäherindäki iňlis dili, himiýa we biologiýa derslerini çuňlaşdyryp öwredýän ýöriteleşdirilen 86-njy orta mekdebiň 9-njy synp okuwçysy Kasym Köçekow kümüş medallara mynasyp boldular.
Aşgabat şäherindäki iňlis dili, himiýa we biologiýa derslerini çuňlaşdyryp öwredýän ýöriteleşdirilen 86-njy orta mekdebiň 8-nji synp okuwçylary Serdar Nazaröwezow, Akmyrat Akmyradow, 9-njy synp okuwçysy Mekan Döwletýarow, Aşgabat şäherindäki iňlis dilini çuňlaşdyryp öwredýän ýöriteleşdirilen 87-nji orta mekdebiň 9-njy synp okuwçylary Ýeňiş Akmämmedow, Atabaý Akmyradow, Mary welaýatynyň Ýolöten etrabyndaky 40-njy orta mekdebiň 8-nji synp okuwçysy Azat Nepesow, Daşoguz welaýatynyň Daşoguz şäherindäki ýöriteleşdirilen 29-njy orta mekdebiň 9-njy synp okuwçysy Röwşen Seýitgulyýew hem-de Aşgabat şäherindäki iňlis dilini çuňlaşdyryp öwredýän ýöriteleşdirilen 135-nji orta mekdebiň 9-njy synp okuwçysy Akmuhammet Şöhratgeldiýew bürünç medallaryň eýeleri boldular.
Sylaglanylyş dabarasynyň dowamynda halkara ders bäsleşikleriniň ýeňijilerine Türkmenistanyň Magtymguly adyndaky Ýaşlar guramasynyň hem-de Türkmenistanyň Senagatçylar we telekeçiler partiýasynyň Merkezi geňeşiniň gymmat bahaly sowgatlary gowşuryldy.
