Türkiýe iş hepdesiniň dowamlylygy boýunça Ýewropada birinji orny eýeleýär. Bu barada Ýewrostatyň soňky maglumatlaryna salgylanyp, Kazinform habar berýär.
Bellenilişi ýaly, ortaça türk işçisi hepdede 43,1 sagat işde bolýar. Bu Ýewropa Bileleşiginde 36 sagada deň bolan ortaça iş wagtyndan 7 sagat köpdür.
Ikinji orunda 41,3 sagat bilen Serbiýa ýerleşýär. Onuň yzyndan Bosniýa we Gersegowina (41,2) we Gresiýa (39,8) gelýär.
Iň gysga iş hepdesi Niderlandlarda hasaba alyndy – 32,1 sagat. Norwegiýada we Irlandiýada hem, bu görkeziji, degişlilikde, 33,7 we 33,9 sagada deň.
Maglumatlara görä, Ýewropa Bileleşiginde 2024-nji ýylda, esasan, şu pudaklaryň işgärleri işde has köp wagt sarp etdi: oba, tokaý we balyk hojalygy (hepdede 41,2 sagat), peýdaly magdanlary gazyp almak (38,8 sagat) we gurluşyk (38,7 sagat). Iş wagtynyň dowamlylygy öý hyzmaty (26,7) we bilim (31,9) pudaklarynda has az boldy.
Türkiýede iň köp zähmet talap eden pudaklar myhmanhana-restoran işi (48,6 sagat) hem-de saglygy goraýyş we jemgyýetçilik goragy (48,3) boldy. Mugallymlar iň az işlän hünärmenler boldy – hepdede 34 sagat.
Şeýle-de, jyns aratapawudy hasaba alyndy: Türkiýede erkekler ortaça 44,8 sagat, aýallar 39,7 sagat işleýär.
Şeýle maglumatlar iş bilen şahsy durmuşyň arasyndaky deňagramlylyga düşünmek hem-de dürli ýurtlarda we ykdysady ugurlarda zähmet şertleriniň hiline baha bermek üçin möhüm ähmiýete eýedir.
