Buharestiň häkimi Nikuşor Dan Rumyniýada geçirilen prezident saýlawlarynyň ikinji tapgyrynda ýeňdi. Resmi maglumatlara görä, býulletenler 100% işlenenden soň, ol 6,1milliondan gowrak ses (53,60%) aldy diýip, Associates Press habar berýär.
Onuň garşydaşy, ultra-sagçy “Rumynlary birleşdirmek üçin bileleşigiň” lideri Jorje Simion 5,3 milliondan gowrak ses (46,40%) aldy.
Ozal şeýle meňzeş netijeleri ekzitpolyň maglumatlary hem görkezipdi: olar Danyň 54%, Simionyň 45% ses alandygyny delillendirdi.
55 ýaşly Nikuşor Dan liberal we Ýewropa gönükdirilen lageriň wekili hasaplanýar. 4-nji maýda geçirilen biirnji tapgyrda ol 20,99% bilen ikinji orny eýeläp, Simiondan (40,5%) yza galdy.
Muňa garamazdan, ses berişligiň ikinji tapgyrynyň netijesi boýunça Dan garşydaşyndan öňe geçdi. Jorje Simion sosial ulgamlarda ýeňlendigini boýun almak bilen wideo ýüzlenmesini ýerleşdirdi we Dany ýeňşi bilen gutlady.
Belläp geçsek, Rumyniýanyň Prezidentiniň saýlawlary gaýtadan geçirildi. 2024-nji ýylyň noýabrynyň ahyrynda geçen öňki ses berişligiň netijeleri “saýlaw prosesiniň dogrulygyny we kanunylygyny üpjün etmek maksady bilen” Konstitusiýa kazyýeti tarapyndan ýatyryldy. Şol wagt saýlawlaryň birinji tapgyrynda ozal ultra-sagçy “Rumynlary birleşdirmek üçin bileleşige” girýän Kelin Jeorjesku ýeňiş gazandy.
