Türkmenistanyñ ýygyndy topary küşt boýunça Günbatar Aziýanyň ýaşlar çempionatynda bir altyn we dört bürünç medala eýe boldy. Ýaryş Täjigistanyň paýtagty Duşenbede geçirildi.
Türkmenistanyň Küşt federasiýasynyň habar bermegine görä, ýaryşa 12 ýurtdan 200-den gowrak oýunçy gatnaşdy. Türkmenistana bu ýaryşda 17 küştçi wekilçilik etdi, olar 8, 10, 12, 14, 16 we 18 ýaş aralygyndaky toparlarda çykyş etdiler.
18 ýaşa çenli gyzlaryň arasynda blitz görnüşi boýunça altyn medala Leýla Şöhradowa (reýtingi 2029) mynasyp boldy. Ol sekiz partiýada ýeňiş gazanyp, birini deňlikde tamamlady. Netijede, Lebap welaýatynyň Dänew etrabyndaky 31-nji orta mekdebiň 12-nji synp okuwçysy 8,5 utuk toplap, birinji orny eýeledi.
8 ýaşa çenli oglanlaryň arasynda blitz görnüşinde bürünç medala aşgabatly Çaryhekim Çaryýew (reýtingi 1732) mynasyp boldy.
Klasiki küşt, rapid we blitz görnüşlerinde 10 ýaşa çenli oglanlaryň arasynda geçirilen toparlaýyn ýaryşlarda bolsa Maksat Awlýakuliýew (reýtingi 1739), Myrat Merdanow (reýtingi 1803) we Didar Hupbyýew (reýtingi 1613) bürünç medallary gazandylar.
