Fransiýanyň ýüzlerçe mekdebinde smartfonlardan, planşetlerden we oýun pristawkalaryndan ýüz öwürmek boýunça 10 günlük sosial tejribe başlady. Ol 13-nji maýdan 22-nji maý aralygynda dowam eder we oňa 117 500-den gowrak çaga gatnaşar diýip, BFMTV habar berýär.
Tejribäniň dowamynda okuwçylar öz gajetlerini okuw güni gutarýança şkafda goýýar. Tejribä çagalar baglaryndan başlap, ýokary synplara çenli bilim edaralary gatnaşýar. Ene-atalardan, terbiýeçilerden we mugallymlardan hem mekdebiň çäklerinde, aýratynam, arakesme wagty telefonlary ýa-da beýleki gurluşlary ulanmazlyk haýyş edilýär.
Bu taslama “jogapkärli sarp ediş we akyl saglygy boýunça maşk” hökmünde häsiýetlendirilýär. Onuň maksady hemmelere olaryň ekranlara näderejede baglanandygyny görkezmekden we gündelik endiklerini üýtgetmäge kömek etmekden ybarat.
Bu 10 günüň dowamynda okuwçylara “aragatnaşyk we ylmy gözlegler” boýunça goşmaça sapaklar berler. Şeýlelikde, olara telefonsyz wagt geçirmegiň hem dürli usullarynyň bardygy görkeziler.
Mundan başga-da, okuwçylara sapak däl wagty, ýagny mekdebe gaýtmazdan ozal irden, uly arakesmede, mekdepden geleninden soň telefondan ýüz öwrendikleri üçin utuk toplamak teklip edilýär.
Belläp geçsek, Fransiýanyň käbir mekdeplerinde okuwçylara okuw gününiň dowamynda ykjam telefonlary ulanmak doly gadagan edildi. Soňky döwürde şeýle düzgünler Ýewropanyň hem köp ýurtlarynda ara alnyp maslahatlaşylýar ýa-da eýýäm girizildi.
