Kenarýakada ýerleşýän Erdek şäherinde Mermer deňzinde peýda bolan deňiz sülekeýi Türkiýäniň demirgazygynda syýahatçylyk möwsümine zyýan ýetirip biler. Bu barada ýerli metbugat habar berýär.
Syýahatçylaryň we ýaşaýjylaryň “himiki suwoty” diýip atlandyrýan deňiz sülekeýi alymlary alada goýýar. Professor Mustafa Saranyň sözlerine görä, onuň Mermer deňziniň tutuş ýüzüne ýaýrap, doly örtmegi ähtimal. Has beteri, bu geljek möwsümde syýahatçylyk pudagynyň işine howp salyp biler.
Stambulyň kenarlarynda mýusilaž diýlip hem atlandyrylýan sülekeýiň peýda bolandygy 2025-nji ýylyň başynda ýüze çykarylypdy. Şeýle-de bolsa, daşky gurşawy goraýjylar bu meseläniň täzelik däldigini ýatladýarlar, bu dört ýyl ozal bellige alnypdy we bu barada dessine hökümete habar berlipdi. Şol döwürde Türkiýäniň Prezidenti Rejep Ärdogan hem bu hapalanmanyň ýaýramagynyň öňüni almagy wada berip, ýagdaýa goşulypdy.
Aýdyn uniwersitetiniň wekili, professor Gýuwen Ozdemir sülekeýiň ýaýramagynyň sebäplerini düşündirdi. Alymyň sözlerine görä, onuň peýda bolmagy diňe adamyň işjeňligi, esasanam, deňziň hapalanmagy bilen baglanyşykly. Professor himiki hapalanmanyň senagatyň galyndylary we lagym suwlary bilen bagly döreýändigini tassyklaýar.
