Ilon Maskyň xAI kompaniýasy tarapyndan işlenip taýýarlanan Colossus superkompýuteri Memphis Supercluster taslamasynyň çäklerinde doly güýjüne işläp başlady. Onuň energiýany sarp edişi şeýle bir ýokary welin, ol 300 000 ýaşaýyş jaýynyň sarp etjek toguna barabar diýip, Tom’s Hardware habar berýär.
Häzir Tennessi ştatynyň Memfis şäherinde ýerleşýän kuwwatly EA toplumy ýerli elektrik ulgamyna doly birikmäge taýýar. Ol Memphis Light, Gas and Water (MLGW) we Tennessee Valley Authority (TVA) kompaniýalaryndan 150 MWt möçberde energiýa alar. Mundan başga-da, elektrik öçen ýagdaýynda ýa-da bökdençlikler bolanda ätiýaçlyk üçin 150 MWt kuwwatly Tesla Megapack akkumulýatorlary göz öňünde tutuldy.
Ilon Maskyň superkompýuteri geçen ýylyň iýul aýynda 100 000 sany Nvidia H100 çibi bilen işläp başlady. Nvidia-nyň ýolbaşçysy Jensen Huang enjamlaryň rekord möhletde – 19 günde gurnalandygyny aýtdy, adatça, bu iş dört ýyla golaý wagt alýar. Howlukmaçlyk sebäpli başlangyç tapgyrda gaz turbina generatorlaryny ulanmaly boldy, çünki elektrik ulgamyna gönüden-göni birikme ýokdy. Ilkibaşda her biri 2,5 MWt kuwwatly 14 generatoryň bardygy habar berildi, ýöne ýerli ýaşaýjylar olaryň 35-den gowrakdygyny aýtdy.
Taslamanyň birinji tapgyrynyň işe girizilmegi Colossus-yň indi TVA-dan esasy energiýany ulanyp biljekdigini aňladýar. Bu kompaniýanyň elektrik energiýasynyň, takmynan, 60%-i gaýtadan dikeldilýän çeşmelerden alynýar: suw, Gün, ýel we atom. Şonuň netijesinde wagtlaýyn generatorlaryň ýarysyna golaýy öçürildi. Galanlary 150 MWt kuwwatly ikinji podstansiýa işläp başlaýança, güýze çenli işlär. Superkompýuteriň umumy kuwwaty 300 MWt bolar. TVA şeýle energiýany beýleki sarp edijilere zyýan ýetirmezden üpjün edip biljekdigine ynandyrýar.
Fewral aýynda çipleriň sany 200 000-e çenli artdyryldy, indi bolsa Ilon Mask olaryň sanyny milliona ýetirmegi meýilleşdirýär. Munuň üçin has köp elektrik energiýasy gerek bolar we häzirlikçe TVA-nyň şeýle energiýany ýerli ilat üçin bökdençlik döretmezden üpjün edip biljekdigi belli däl.
Taslama Memfisiň köp ýaşaýjylarynyň nägileligine getirdi diýip, The New Yorker ýazýar. Adamlar howanyň hapalanmagyndan, elektrik ulgamlaryna agram düşmeginden we suw ýetmezçiliginden howatyrlanýar. Generatorlaryň oturdylan ýerinde eýýäm ýerli aktiwistler bilen çaknyşyk boldy. Käbirleri taslamany togtatmagy, beýlekiler bolsa barlag geçirip, xAI-iň meýilnamalaryny köpçülige mälim etmegi talap edýär.
