DoorDash amerikan kompaniýasy Beýik Britaniýanyň Deliveroo nahar eltip bermek hyzmatyny 2,9 mlrd funt sterlinge (takmynan, 3,9 mlrd dollara) satyn almak boýunça ylalaşdy. Ylalaşyga görä, DoorDash Deliveroo-nyň her bir paýnamasy üçin 180 pens töleýär, bu bolsa onuň häzirki bahasyndan 44% köpdür. Geleşigiň tamamlanmagy üçin, iki kompaniýanyň paýdarlarynyň hem razylygy gerek bolar.
Ylalaşyk üstünlikli amala aşyrylsa, birleşen kompaniýa 40-dan gowrak ýurtda işlär we her aýda, takmynan, 50 million müşderä hyzmat eder. 2024-nji ýylda DoorDash bilen Deliveroo-nyň bilelikdäki umumy sargyt bahasy 90 mlrd dollar boldy.
DoorDash-yň baş direktory Toni Sýuý Deliveroo toparynyň işine «köpden bäri haýran galyp gelýändigini» belläp, olaryň «müşderilerine höwes bilen hyzmat edýändiklerini» aýtdy. Şeýle-de bolsa, Deliveroo bazarda kynçylyklar bilen ýüzbe-ýüz boldy. 2021-nji ýylda kompaniýa Londonyň gazna biržasynda paýnamalaryny ilkinji gezek hödürlän mahaly, şowsuzlyga uçrady – söwdanyň ilkinji gününde olaryň bahasy tas 30% diýen ýaly aşaklady. Şondan bäri, Deliveroo-nyň paýnamalary öz gymmatynyň 50%-den gowragyny ýitirdi.
Ylalaşyk baradaky habardan soň, Deliveroo-nyň paýnamalarynyň bahasy, takmynan, 2% ýokarlandy. DoorDash-yň paýnamalary bolsa, elektron söwdada 0,15% ýokarlandy.
