Microsoft korporasiýasy Windows 11 üçin täzelenen “Başlat” (Start) menýusyny hödürledi. Indi ol sazlap bolýan makete we Phone Link programmasy bilen baglanyşyga eýe boldy.
Menýunyň täze funksiýalary barada ilkinji yşaratlar bir aý mundan öň peýda boldy, şol wagt kompaniýanyň programmalar sanawyny esasy menýu bilen birleşdirjek bir umumy interfeýsiň üstünde işleýändigi belli boldy. Indi täzelenen “Başlat” menýusy resmi taýdan Windows 11-iň täze aýratynlyklarynyň bir bölegi hökmünde hödürlendi.
Täzelenmede ähli programmalaryň sanawy penjiräniň aşaky bölegine geçirildi we indi onuň görkezilişiniň üç görnüşi bar: adaty sanaw, gözenek ýa-da kategoriýalar boýunça toparlara bölnen görnüşde. Ulanyjylar has amatly görnüşi saýlap biler.
“Başlat” menýusynyň sag tarapynda Phone Link interfeýsine çalt girmek üçin düwme peýda boldy. Ol telefonyň batareýasynyň zarýad derejesini, birikdirme ýagdaýyny, soňky habarlary we suratlary görkezýär.
Menýu sazlamalaryň giňeldilen mümkinçiliklerine eýe boldy. Ilki berkidilen programmalaryň sanawy görkezilýär, “Maslahat berilýänler” lentasyny bolsa gizlemek mümkinçiligi peýda boldy - şeýle ýagdaýda berkidilen programmalar ähli programmalaryň sanawyndan ýokarda ýerleşer. Bu ulanyjylara interfeýsi öz isleglerine görä sazlamaga mümkinçilik berýär.
Programmalar siziň olary ulanylyş ýygylygyňyza görä awtomatik taýdan tertiplenýär, bu hem gerekli zady çalt tapmaga mümkinçilik berýär.
Microsoft-yň belleýşi ýaly, “Başlat” menýusy indi şahsylaşýar, ýagny onuň nähili görünmelidigini we haýsy funksiýalary ulanmalydygyny siziň özüňiz kesgitleýärsiňiz.
