Hytaýyň Şençžen şäherinde Zaha Hadid Architects býurosynyň taslamasy boýunça döredilen ylym we tehnologiýa muzeýi açyldy. Ol täze ylym seýilgähiniň günorta-gündogarynda ýerleşip, binagärlik merkezi bolup hyzmat edýär diýip, Designboom habar berýär.
Muzeýiň binasy seýilgähe tarap görnüş açýan tolkun görnüşli eýwanlar bilen şar şekile eýe boldy. Eýwanlar merkezi atriumy gurşap alýan içerki galereýalary dowam etdirýär. Seýilgähe çykýan aýna diwar bolsa sergi zallaryny tebigat bilen birleşdirýär.
Binanyň fasady iki reňkli poslamaýan polatdan ýerine ýetirildi. Hytaýda ilkinji gezek şeýle masştabda ulanylan bu tehnologiýa reňkiň goýy gökden çal reňke akgynly geçişini üpjün edip, asman reňkleri bilen sazlaşýar.
Muzeýiň umumy meýdany 128 müň inedördül metre barabar. Hemişelik we wagtlaýyn ekspozisiýalar 35 müň ineördül metr meýdany tutýar. Immersiw teatrlar we kinoteatrlar 6 müň inedördül metri, okuw edaralary, barlaghanalar we innowasion merkez 5,4 müň inedördül metri eýeleýär.
Muzeý diňe bir binagärlik desgasy däl-de, eýsem sebitde möhüm ylym we bilim merkezi boldy.
