Hytaýyň Suçžou şäherinde Jinji kölüniň kenarynda BIG (Bjarke Ingels Group) arhitektura býurosy tarapyndan taslanan Häzirki zaman sungat muzeýiniň gurluşygy tamamlanyp gelýär. Hypebeast neşiriniň habar bermegine görä, toplumyň umumy meýdany 60 000 inedördül metr bolar we ony 2026-njy ýylda açmak meýilleşdirilýär.
Arhitektorlar binany Hytaý obasynyň döwrebap görnüşi hökmünde tasladylar: 12 sany pawilýon (sergi jaýy) umumy lentany ýatladýan üçek bilen birleşdirilendir. Bu konsepsiýa klassiki Suçžou seýilgählerinden ylham alyp, däp bolan elementleri we döwrebap görnüşleri utgaşdyrýar. Pawilýonlar aýnadan ýasalan galereýalar bilen birleşip, howlulardan we sergi zallaryndan ybarat özboluşly «Hytaý düwünini» emele getirýär.
Resmi açylyşdan öň, muzeý «Materializm» atly sergini hödürlär. Oňa BIG býurosy kuratorlyk eder. Sergi kompaniýanyň 20 taslamasynyň, şol sanda Kopengagendäki studiýanyň baş binasy we Google Bay View ýaly taslamalaryň uly maketlerini we modellerini görkezer. Myhmanlar ýer, metal, agaç we plastmassa ýaly materiallaryň arhitektura çözgütlerini nädip emele getirýändigini görüp bilerler.
