Nýu-Ýorkuň Kolumbiýa uniwersitetinde 2025-nji ýylyň Pulitser baýragynyň laureatlary yglan edildi. Doly sanaw baýragyň saýtynda ýerleşdirildi.
“Jemgyýete hyzmaty üçin” nominasiýasynda baýragy ABŞ-da çaga aýyrtmagy gadagan etmegiň netijeleri baradaky reportaž üçin ProPublica täjirçilik däl guramasy aldy.
The Washington Post-yň žurnalistleri 2024-nji ýylyň 13-nji iýulynda Donald Trampyň janyna kast edilendigi baradaky gyssagly reportaž üçin baýrak aldy.
The New York Times dört baýraga, şol sanda Sudandaky dawalaryň derňewi üçin “Daşary ýurt reportažy” we ABŞ-nyň Owganystandaky şowsuzlyklarynyň seljermesi üçin “Düşündiriş reportažy” nominasiýalarynda baýraga mynasyp boldy. Neşiriň fotosuratçysy Dug Mills Trampyň janyna kast edilende atylan okuň suraty üçin baýrak aldy.
Reuters agentliginiň topary fentaniliň önümçiligi üçin maddalaryň söwdasy baradaky makala üçin “Görnükli derňew” nominasiýasynda ýeňiji boldy. The Wall Street Journal bolsa Ilon Maskyň “syýasy we şahsy üýtgeşmelerini” öwrenendigi üçin “Milli reportaž” nominasiýasynda baýrak bilen sylaglandy.
The New Yorker üç baýrak, şol sanda Mosab Abu Tohanyň “Gazadaky fiziki we emosional uruş barada” essesi üçin “Teswirler” baýragyny aldy. The Washington Post-yň öňki karikaturaçysy Enn Telnaes senzura sebäpli neşirden gideninden soň batyrgaýlygy üçin tapawutlandy.
Edebi nominasiýalarda iň gowy roman Persiwal Ewerettiň “Geklberri Finni” başgaça düşündirýän “Jeýms” romany boldy – onda waka garaýagyz gul Jimiň nukdaýnazaryndan beýan edilýär. Non-fikşn üçin baýragy Benjamin Natansyň sowet dissident hereketi baradaky kitaby aldy.
Pulitser baýragynyň ýeňijilerini Kolumbiýa uniwersitetiniň ýörite eminleri kesgitleýär. Bu žurnalistika pudagynda iň abraýly baýraklaryň biridir.
Baýrak her ýyl 20 kategoriýada berilýär. Şu ýyl laureatlar 109-njy gezek yglan edildi.
