ABŞ-nyň Adalat ministrligi (DOJ) Google-yň sanly mahabat bazaryndaky monopoliýasyny aradan aýyrmak üçin, onuň esasy mahabat platformalary bolan Google AdX we Google Ad Manager-i satmagyny talap etdi. Google AdX internetdäki mahabat ýerleriniň söwdasy boýunça iň uly platformalaryň biridir. Google Ad Manager bolsa, saýtlaryň eýelerine mahabat ýerleşdirmäge mümkinçilik berýär diýip, «Financial Times» neşiri habar berýär.
Goşmaça çäre hökmünde, ABŞ-nyň Adalat ministrligi Google-dan bäsdeşlerine teklipler baradaky maglumatlary häzirki wagtda elýeterli etmegini hem talap edýär. Bu meseleler boýunça kazyýet diňlenşigi 22-nji sentýabrda Wirjiniýa ştatynyň federal kazyýetinde geçiriler. Mundan ozal hem başga bir kazyýet Google-yň öz platformalaryny birleşdirip, bäsdeşlerine päsgel berip, bazarda monopoliýa döredendigini kesgitläpdi.
Şeýle-de bolsa, ministrlik beýleki bir ugur bolan mahabat ýerleşdiriş torlarynda Google-yň monopoliýasyny subut edip bilmedi. Şeýlelikde, kompaniýa diňe iki esasy ugur boýunça aýyplandy. Google bu talaplaryň hemmesine garşy çykyp, Meta, Amazon we TikTok bilen bäsleşýändigini aýtdy. Kompaniýa bahalar baradaky maglumatlary paýlaşmaga taýardygyny, emma platformalary satmak islemeýändigini mälim etdi.
Ýatlatsak, mundan ozal başga bir kazyýet Google-yň Safari brauzerinde öz gözleg ulgamyny deslapky hökmünde ýerleşdirmegi üçin, Apple kompaniýasyna 20 milliard dollar töländigini we gözleg bazarynda hem monopoliýa döredendigini kesgitläpdi. Şeýle-de derňew işleriniň dowamynda, ABŞ-nyň Adalat ministrligi Google-dan Chrome brauzerini satmagyny talap edipdi. Şeýle hem San-Fransiskodaky federal kazyýet Google-yň mobil programmalaryň arayndaky bäsdeşlige hem päsgel berýändigini aýdyp, Android operasion ulgamyny açyk saklamagy (open source) tabşyrdy.
