Hytaýly alymlar “Týangun” orbital stansiýasynda alty aýlap bolan adamlaryň we haýwanlaryň embrionlaryna mikrograwitasiýanyň eden täsirini öwrenip başlarlar. Bu barada Hytaýyň Ylymlar akademiýasyna salgylanýan TASS habar berýär.
Onuň WeChat-daky sahypasynda görkezilişine görä, çarşenbe güni “Şençžou-19” missiýasynyň ekipažy Ýere 37,25 kg nusga getirdi. Olar dürli kosmos synaglarynda, şol sanda biologiki synaglarda ulanyldy.
Mysal üçin, olaryň arasynda ösüşiniň irki döwründäki embrionlar, adamyň süňk we sütün öýjükleri, belok nusgalary we miwe çirkeýleri bar.
"Bu nusgalaryň seljermesi kosmosda adamyň saglygyny gorap saklamaklyga degişli möhüm maglumatlary almaga mümkinçilik berer diýlip garaşylýar" - diýip, Ylymlar akademiýasy belledi.
"Şençžou-19” kosmos gämisi 2024-nji ýylyň 30-njy oktýabrynda pekin wagty bilen 04:27-de Szýuszýuan kosmodromyndan uçuryldy. Uçarda üç sany taýkonawt, şol sanda bir aýal bardy. Olar alty aý stansiýada bolup, ekipaž çalşygyndan soň 30-njy aprelde Ýere gaýdyp geldiler.
“Týangun” orbital stansiýasy, takmynan, 400 km belentlikde ýerleşýär. Onuň agramy 66 tonna, içki göwrümi 110 kub metr. Stansiýa üç adam üçin niýetlenendir, ýöne ekipažlaryň çalyşýan wagty wagtlaýynça alty sany taýkonawty ýerleşdirip biler.
Stansiýa 2022-nji ýyldan bäri kadaly tertipde işleýär we halkara ylmy taslamalara gatnaşýar.
