Starbucks baristalaryň sanyny artdyrmagy, iş çalşygyny uzaltmagy we öňki awtomatizirleme syýasatyndan ýüz öwürmegi meýilleşdirýär. Bu barada The Guardian habar berýär.
Kompaniýanyň baş direktory Braýan Nikkol maýadarlar bilen gürrüňdeşlikde işgärleriň sanynyň azaldylmagynyň hyzmatyň hiline ýaramaz täsir edendigini aýtdy.
Ol soňky bir-iki ýylda dükanlarda işçi güýjüniň aýrylyp, tehnika bil baglanandygyny, ýöne munuň garaşylan netijäni bermändigini belledi.
2024-nji ýylyň tomsunda Nikkol kompaniýa geleninden bäri Starbucks 3 müň kofehana has köp işgär aldy. Umuman alanyňda, Starbucks-yň dünýäde 36 müň kofehanasy bar. Munuň bilen bir wagtda kompaniýa içgileri taýýarlamagy çaltlaşdyrmak üçin niýetlenen Siren Craft ulgamynyň ulanylmagyny azaldýar.
Nikkol müşderi hyzmatynyň hilini ýokarlandyrmak üçin diňe bir enjamlaryň däl-de, eýsem ýeterlik derejede işgärleriň gerekdigini belledi.
Şeýle-de, ol menýuny ýönekeýleşdirmäge, baha syýasatyny üýtgetmäge we täze tagamlary goşmaga wada berdi.
Kompaniýa eýýäm rahat mebellere, keramiki gaplara we bulgurlardaky ýazgylara gaýdyp geldi. Bu rahat atmosferany döretmäge we myhmanlaryň kafede uzak galmagyna ýardam edýär. Şeýle-de bolsa, ýylyň ilkinji üç aýynda Starbucks-yň satuwy 1% azaldy – bu yzygider bäşinji pese gaçyşdyr. Nikkol netijäniň “kanagatlanarsyzdygyny” belledi, ýöne Hytaýda we Kanadada ösüşiň bardygyny aýtdy.
