Bred Pitt awstraliýaly ýazyjy Tim Uintonyň “Atlylar” romany esasynda düşüriljek filmde baş keşbi janlandyrar. Taslama “Konklaw” we “Günbatar frontda üýtgeşiklik ýok” filmlerini döreden Edward Berger režissýorlyk edýär diýip, Variety žurnaly habar berdi.
Önümçilik A24 studiýasy tarapyndan amala aşyrylar. Film 2026-njy ýylyň başynda surata düşürilip başlanar we Ýewropanyň birnäçe şäherinde geçer.
Filmiň sýužeti maşgalasy bilen Irlandiýa göçüp, ýitirim bolan aýalyny gözleýän adam baradaky wakany gürrüň berýär. Edebi esasyny “Suspiriýa” we “Uly pagşyldy” filmleri bilen tanalýan Dewid Kaýganiç ýazar. Şeýle hem ol prodýuser bolup çykyş eder.
Taslama Ridli Skottyň Skott Free, Edward Bergeriň Nine Hours we Bred Pittiň Plan B kompaniýalary gatnaşýar.
1995-nji ýylda neşir edilen "Atlylar" romanynda detektiw hekaýanyň alamatlary bilen psihologiki triller özara utgaşýar. Tim Uinton köp sanly edebi baýraklarynyň eýesi.
“Atlylardan” başga-da, Bred Pitt ýakyn wagtda Jozef Kosinskiniň “Formula-1” dramasynda peýda bolar. Şeýle hem ol “Bir gezek... Golliwudda” filminiň “Kliff Butyň başdan geçirmeleriniň dowamy” atly sikweliniň üstünde işleýär. Taslama Dewid Finçer režissýorlyk eder we edebi esasyny Kwentin Tarantino ýazýar.
