Taýwanly ägirt TSMC häzirki wagtda dünýäniň dürli künjeklerinde şol bir wagtyň özünde 24 sany zawody gurar. Bu zawodlaryň 15-si Taýwanda ýerleşýär (şolaryň 11-si plastina öndürýän fabrika, 4-si bolsa çip gaplaýyş kärhanasy), 6-sy ABŞ-nyň Arizon ştatyndaky Fab 21 taslamasynyň çäginde gurulýar, galanlary bolsa Ýaponiýada we Germaniýada ýerleşýär. Bu strategiýa kompaniýanyň ýarymgeçiriji bazaryndaky öňdebaryjylygyny güýçlendirmäge gönükdirilendir.
TSMC 2020-nji ýyla çenli, ýylda ortaça 3 zawod gurýardy. 2021-nji ýyldan başlap, gurluşygyň tizligi birden ýokarlanyp, ýylda 5 zawoda çykdy, 2024-nji ýylda bolsa birbada 9 desganyň gurluşygyna badalga berildi. Bir zawodyň gurluşygynyň 3-4 ýyla çekýändigine garamazdan, kompaniýa häzirki wagtda 24 ýerde bir wagtda iş alyp barýar. Gyzykly tarapy, daşary ýurtlardaky zawodlarda öndürilýän önümleriň hili Taýwandakylardan pes däl.
Analitikleriň çaklamasyna görä, TSMC öňümizdäki ýyllarda hem bazardaky liderligini saklar. Sebäbi, häzirki wagtda Intel-iň taslamalary doňduryldy, Samsung bolsa tehniki kynçylyklar bilen ýüzbe-ýüz bolýar. Şol bir wagtyň özünde, TSMC täze 2-nm tehnologiýasy (N2) bilen öndürilen çipleriň ýokary hillidigini mälim etdi. Bu çipleriň köpçülikleýin önümçiligine ýylyň ikinji ýarymynda başlanmagyna garaşylýar.
Bu çalt ösüş işgär sanynyň artdyrylmagyny talap edýär. Garaşylmagyna görä, işgärleriň sany 2026-njy ýyla çenli 100 müňden geçer, bu bolsa 2019-njy ýyldaky 51 müň bilen deňeşdirilende ep-esli ýokarydyr. Ösüşiň tizligine garamazdan, TSMC täze hem-de işjeň desgalaryň hemmesinde hem ýokary önümçilik hilini saklaýar.
