“Sýogun” serialynyň ikinji möwsümi 2026-njy ýylyň ýanwarynda surata düşürilip başlanar. Bu barada FX teleýaýlymynyň wekilleri Deadline neşirine habar berdi.
Hiroýuki Sanada lord Ýosi Toranaganyň keşbine gaýdyp geler, Kosmo Jarwis bolsa ýene-de britaniýaly deňizçi Jon Blektorny oýnar. Aktýorlaryň ikisi-de ýerine ýetiriji prodýuserler hökmünde hem çykyş eder.
FX ikinji möwsümiň wakalarynyň birinji bölümiň wakalaryndan on ýyl soň bolup geçjekdigini belledi. Täze möwsüm “düýbünden özboluşly täze bap” bolar.
“Ikinji möwsüm ykballary berk baglanyşykly bolan dürli dünýälerden iki adam baradaky taryhy taýdan ruhlanan wakany dowam etdirer” – diýlip, teleýaýlymyň beýanynda aýdylýar.
Ssenarini Reýçel Kondo we Jastin Marks ýazdy. Olaryň aýtmagyna görä, täze waka Jeýms Klawelliň romamyndaky personažlara, şeýle-de “Aziýa sagasy” kitaplaryna esaslanýar.
Serial birinji möwsüm ýaly Wankuwerde düşüriler. Ilkibaşda Ýaponiýada düşürmek meýilleşdirildi, soňra bu pikirden ýüz öwrüldi.
“Surata düşüriş bazasynyň uludygy we çäkli mümkinçilikler sebäpli göçmek kyn bolar. Üstesine-de, Ýaponiýanyň orta asyr galalary ýa-ha saklanyp galan däldir, ýa-da ol ýerde surata düşürmek mümkin däl” – diýip, FX-iň wekili Jon Landgraf belledi.
Şeýle-de, ol ikinji we üçünji möwsümleriň bir wagtda düşüriljekdigini habar berdi, ýöne serialyň dowamy heniz tassyklanmadyk.
Birinji möwsüm FX-iň iň meşhur taslamasy boldy. Ol 18 “Emmi” baýragyna mynasyp bolup, Sanada bilen Anna Sawainiň aktýorlyk nominasiýalarynda ýeňiş gazanmagyna getirdi.
